जनकपुरधाम । राजपाका चार मन्त्री बर्खास्त भएपछि आगामी रणनीति तय गर्न बैठक बसेको छ । सोमबार दिउँसो पूर्वमन्त्री जितेन्द्र सोनलको नेतृत्वमा बैठक बसिरहेको हो । प्रदेशसभामा बसेको बैठकमा तत्कालीन राजपाबाट निर्वाचित २५ जना सांसदमध्ये १५ सहभागी छन् । केही सांसद आउने क्रममा रहेको बताइएको छ ।

जसपा उपेन्द्र समूहले प्रदेश सरकारबाट ठाकुर–महतो पक्षका ४ मन्त्री हटाएर कांग्रेस र माओवादीलाई सरकारमा ल्याउने तयारी गरिरहेको छ । समाजवादी पार्टी र राजपा समायोजन हुन नसकेको अवस्थामा सोनलले राजपा संसदीय दलको नेताको हैसियतमा प्रदेशसभामा निर्वाह गर्ने भूमिकाबारे रणनीति बनाउने बैठक बोलाएको बुझिएको छ । 

यसअघि आइतबार जसपा अध्यक्ष उपेन्द्र यादवले संसदीय दलको विधान बहुमतले पारित गरेर दलको नेतामा मुख्यमन्त्री लालबाबु राउतलाई चयन गरेका छन् । 
प्रदेश २ का मुख्यमन्त्री लालबाबु राउतले महन्थ ठाकुर र राजेन्द्र महतो समूहमा रहेका भौतिक पूर्वाधार मन्त्री जितेन्द्र सोनल, राज्यमन्त्री डिम्पल झा, पर्यटन राज्यमन्त्री सुरेश मन्डल र वन राज्यमन्त्री अभिराम शर्मा लाई बर्खास्त गरेका थिए ।