काठमाडौं । नेकपा एमालेका नेता योगेश भट्टराईले अध्यक्ष तथा प्रधानमन्त्री केपी शर्मा ओलीको आइतबार सार्वजनिक वक्तव्य सकारात्मक भएको बताएका छन् । प्रधानमन्त्रीले वक्तव्य जारी गरे लगत्तै  प्रतिकिया दिँदै उनले एमालेको एकतालाई अक्षुण राख्न मद्घत पुग्ने अपेक्षा पनि गरेका छन् ।

“नेकपा एमालेका अध्यक्ष कमरेड केपी शर्मा ओलीले नेकपा एमालेको एकताका लागि आज सार्वजनिक वक्तव्य मार्फत गर्नु भएको आह्वान मुलत सकारात्मक छ । कार्यदल स्तरको छलफललाई यो वक्तव्यले पुन निरन्तरता दिन बाटो खुलेको छ । पार्टीका जिम्मेवार नेता कमरेडहरू सम्मिलित कार्यदलले स्पष्ट गर्नु पर्ने र मिलाउनु पर्ने थप विषयहरूलाई समाधान गर्ने छ,” उनले भनेका छन् । 

साथै उनले सर्वोच्चमा विचाराधीन विषय सबै सम्भावनालाई ख्याल गर्दै र मुलत संविधानको रक्षा, लोकतान्त्रिकमा प्रकृयाको निरन्तरता र पार्टी एकताको लागि तार्किक निष्कर्षमा पुग्नु उपयुक्त हुने बताएका छन् ।

“सारमा अध्यक्षको वक्तव्यले पार्टीको शीर्ष नेतृत्वकाबीचमा सार्थक संवाद हुनेछ र नेकपा एमालेको एकतालाई अक्षुण राख्न मदत पुग्ने अपेक्षा गर्दछु । हजार माइलको यात्रा पहिलो पाइलाबाट नै सुरु हुन्छ,”उनले भनेका छन् ।

आज ओलीले सर्वोचमा दायर रिटमा गरिएको हस्ताक्षर फिर्ता लिए आफू जेठ २ मा फर्कन तयार रहेकोसहितको प्रस्ताव गरेका छन् ।