काठमाडौं । उपप्रधान तथा सहरी विकासमन्त्री राजेन्द्र महताको पुतला जलाउन खोज्दा सत्तारूढ पार्टी एमालेका खनाल–नेपाल समूहनिकट ११ जना युवा विद्यार्थी पक्राउ परेका छन् ।

पक्राउ पर्नेमा खनाल–नेपालनिकट अनेरास्ववियुका अध्यक्ष सुदेश पराजुली, महासविच आरती लामा, सचिवहरू टपेन्द्र शाही, मेधनाथ चापागाईं रहेका छन् । त्यस्तै, महेश श्रेष्ठ, अशोक थापा, लक्ष्मी क्षत्री, हर्क बम, आकाश खनाल, अमर पुन, मानबहादुर बुढा पनि पक्राउ परेको बताइएको छ । बानेश्वरबाट पक्राउ परेका उनीहरूलाई अहिले महेन्द्र पुलिस क्लब राखिएको महासचिव लामाले जानकारी दिइन् ।

उपप्रधानमन्त्री महतोले बहुराष्ट्र राज्यको वकालत गर्दै देश टुक्र्याउने अभिव्यक्ति दिएकाले आन्दोलित भएको र सोही क्रममा पक्राउ परेको उनको भनाइ छ । 

“महतोले देशघाती अभिव्यक्ति दिएको पछि त्यसको प्रतिरोध गर्दै हामी सडकमा ओर्लिएका हौँ,” लामाले भनिन् ।

महतोलाई तुरुन्तै सरकारबाट हटाउन पनि उनीहरूले माग गरेका छन् ।