काठमाडौं । दुई दिने भर्चुअल बैठकपछि परिस्थितिको समीक्षा र नयाँ निचोड निकाल्न नेता झलनाथ खनाल र माधवकुमार नेपाल समूहले स्थायी कमिटी बोलाएको छ । शनिबार दिउँसो १ बजे स्थायी कमिटी बैठक आह्वान गरिएको युवराज ज्ञवालीले जानकारी दिए । उनका अनुसार बैठक भर्चुअल माध्यमबाट हुने छ । 

“हामीले दुई दिन केन्द्रीय सदस्यहरूको धारणा सुन्यौँ । प्रधानमन्त्री केपी शर्मा ओली पक्षसँग वार्ता, छलफल गरिरहेका कमरेडहरूको कुरा पनि सुन्यौँ । सबैको कुराको विश्लेषण गरेर एउटा निष्कर्षमा पुग्नुपर्ने भयो,” ज्ञवालीले बाह्रखरीसँग स्थायी कमिटी बैठकको आवश्यकता प्रष्ट्याउँदै भने ।

केन्द्रीय सदस्यहरूको छलफलमा एकता प्रयासलाई जारी राख्ने र नयाँ क्रान्तिकारी चेतसहितको पार्टी निर्माण गरेर जानुपर्ने दुवै कुरा समानान्तर वेगमा उठेको उनको भनाइ थियो ।

“विचार दुवै कोणबाट आएको छ । हामी एउटा निचोडमा पुग्नुपर्ने हुन्छ,” उनले थपे ।

ओली प्रतिगमन दोहोर्‍याएको दोहोर्‍याई

स्थायी कमिटी सदस्य युवराज ज्ञवाली आम नेता–कार्यकर्ता, समर्थक, सुभेच्छुकको भावना पार्टी एकता भए नै भए पनि परिस्थितिले नयाँ आन्दोलन विकास गर्नुपर्ने दिशामा धकेलेको संश्लेषण सुनाउँछन् । नयाँ पार्टी गठन अपरिहार्य हुँदै गएको उनको निचोड छ । 

“हामीले यसबीचमा एकताको प्रयास नगरेका होइनौँ । वार्ता टोली नै बन्यो । कार्यदल बनाएर छलफल गरौँ न त भनेको पनि हो,” उनी भन्छन्, “तर कार्यदल बनेर छलफल भइरहँदा ओलीले प्रतिगमन दोहोर्‍याए । हामीले संसद् विघटन प्रतिगमन हो भनेका छौँ ।”

उनी ओली आत्मआलोचित भएर नआउँदासम्म वार्ताले निष्कर्ष नदिने बताउँछन् । “उहाँ गल्ती सच्याउन तत्पर हुनुपर्‍यो,” उनी भन्छन्, “संसद् विघट त्रुटि थियो भनेर सच्याउन तयार हुनुपर्‍यो । तब न उनीसँग संवाद हुन सक्छ । यथास्थितिमा संवादको कुनै अर्थ छैन । यसले दिने परिणामको पनि अर्थ छैन ।”