काठमाडौं । मन्त्रिपरिषद्बाट बाहिरिएका प्रदीप ज्ञवालीले सरकारमा रहँदा आफूले तीन लाख ७२ हजार कर बुझाएको बताएका छन् । प्रधानमन्त्री केपी शर्मा ओलीले जसपाका नेताहरूसहित पार्टीका केही नयाँ अनुहार ल्याएर शुक्रबार मन्त्रिपरिषद्मा व्यापक हेरफेर गरेका थिए । सोही क्रममा परराष्ट्रमन्त्रीको जिम्मेवारी सम्हालेका प्रदीप ज्ञवाली पनि सरकारबाट बाहिरिएका थिए ।
शुक्रबार राति ज्ञवालीले आफू सरकारमा रहँदा विदेश भ्रमण बापतको लेभी ३,१४,९३० रुपैयाँ र पारिश्रमिक बापतको लेभी ६,२०,००० गरी जम्मा ९,३४,९३० पार्टी खातामा जम्मा भएको र पारिश्रमिकको कर कट्टीबापत ३,७२,४९१ रुपैयाँ सरकारी कोषमा दाखिला भएको जनाएका छन् ।
उनले हाल आफ्नो खातामा ७,४१,७७५ रुपैयाँ बचत रहेको पनि बताएका छन् । उनले आफू मन्त्री रहँदा केही घरायशी सामान एवं दुई सय जति पुस्तक थपिनुबाहेक मन्त्री बने लगत्तै सार्वजनिक आफ्नो सम्पत्ति विवरणमा कुनै फेरबदल नभएको पनि बताएका छन् ।
साथै उनले आफूले प्रयोग गर्दै आएका सवारी साधन र ल्यापटप (म्याकबुक प्रो) शुक्रबार नै मन्त्रालयलाई फिर्ता गरेको र पुल्चोकस्थित सरकारी निवास शनिबार बिहान छाड्ने पनि जनाएका छन् ।
उनले नवनियुक्त मन्त्रीहरूलाई बधाई तथा शुभकामना पनि दिएका छन् ।
