काठमाडौं । नेकपा एमालेको खनाल–नेपाल समूहको दुई दिन चलेको केन्द्रीय कमिटी भेलामा दुई खाले मत देखिएको छ । बैठकमा सहभागी एक केन्द्रीय सदस्यका अनुसार केहीले अन्तिम समयसम्म पार्टी एकताका लागि पहल गर्नुपर्ने धारणा राखेका छन् भने धेरै जसोले नयाँ पार्टी गठन गर्नुको विकल्प नभएको सुझाएका छन् ।
“आजको बैठकमा पनि हिजोको जस्तै नै सुझाव रह्यो । एक खाले साथीहरूको धारणा पार्टी एकताका लागि लामै समयसम्म प्रयत्न गर्नुपर्छ भन्ने छ । एक खालका साथीहरूले हामीलाई पाटीविहीन बनाइन्छ । केपी ओलीले शुद्ध मनले वार्ता गरेको होइन् । उपयोग गर्न नाटक गरिएकाले छिट्टै नयाँ पार्टी बनाउनुपर्छ भन्ने धारणा राख्नुभयो ” एक केन्द्रीय सदस्यले भने ।
भर्चुअल रूपमा भएको भेलामा पार्टी एकता पार लाग्दैन् छिट्टै नयाँ पार्टी गठन गरौं भन्नेहरूको संख्या बढी रहेको ती नेता बताउँछन् ।
“बैठक त्यही दुई खालको धारणमा नै सकिएको छ । तर, पार्टी एकता सम्भव छैन । नयाँ पार्टी गठन गरेर जानुपर्छ भन्ने कमरेडहरूको संख्या धेरै छ,”ती नेताले सुनाए ।
खनाल–नेपाल समूहले वार्ता जारी राख्ने र समानान्तर कमिटी गठनलाई पनि निरन्तरता दिने भएको छ ।
“वार्ता जारी राख्ने तर धेरै लामो समय नराख्ने भन्ने कुरा भएको छ । सम्भव भएसम्म कोरोनाको समयमा पनि समानान्तर कमिटी गठन गर्ने दिशामा अघि बढ्ने कुरा नै हो,” अर्का केन्द्रीय सदस्यले भने ।
बैठकमा नेता माधवकुमार नेपालले केपी ओली नसुध्रिने भएकाले आँट गरेर अघि बढ्नुपर्ने धारणा राखेको ती नेताले बताए ।
“ओली मात्रै नभएर उहाँका तर्फबाट वार्ता टोलीमा भएकाहरूले नै कार्यदल भंग भएको भनिसक्नुभएको छ । एकता सम्भव छैन । अन्तिम एउटा बाटो रोज्नुपर्छ । उहाँको कुरामा टसमस छैन् ”, ती सदस्यले सुनाए ।
त्यस्तै बैठकले बजेटदेखिका विषयहरू समेटेर एउटा वक्तव्य निर्णय जारी गर्ने निर्णय गरेको छ ।
एमालेको ओली समूह खनाल–नेपाल समूह कमजोर पार्ने प्रयत्नमा छ । उक्त समूहका दोस्रो तहका नेताहरूलाई तान्ने प्रयास भइरहेको बताइएको छ । तथापी उक्त समूहले पार्टी एकताको प्रयासका लागि भन्दै स्थायी कमिटी बैठक सार्दै आएको छ ।