काठमाडौं । जनता समाजवादी पार्टी जसपा एमाले नेतृत्वको सरकारमा सहभागी हुने भएको छ । शुक्रबार भएको सहमतिअनुसार राजेन्द्र महतोको नेतृत्वमा जसपा सरकारमा सहभागी हुन लागेको बालुवाटार स्रोतले जानकारी दियो ।
“राजेन्द्र महतोको नेतृत्वमा जसपा ८ मन्त्री र २ राज्यमन्त्रीसहित सरकारमा सहभागी हुन लागेको हो,” स्रोतले बाह्रखरीसँग भन्यो “महतो उपप्रधान तथा सहरी विकासमन्त्री बन्ने पक्कापक्की भएको छ । अरूको टुङ्गो लाग्न बाँकी रहेको छ ।”
स्रोतले ८ बजे शपथ ग्रहण तय भएको जानकारी दियो ।
“लामो छलफलपछि उहाँहरू सरकारमा जान राजी हुनुभएको हो,” स्रोतले भन्यो ।
त्यस्तै जनता समाजवादी पार्टीका नेता लक्ष्मणला कर्णले पार्टी सरकारमा सहभागी हुन लागेको जानकारी दिए ।
“हामी सरकारमा सहभागी हुन लागेका हौँ । प्रधानमन्त्रीसँगको लामो संवादपछि हामी सरकारमा सहभागी हुने कुुराको टुङ्गो लागेको छ,” कर्णले बाह्रखरीसँग भने, “कोको मन्त्री बन्दै हुनुहुन्छ, त्योचाहिँ टुंगो लाग्न बाँकी छ । शपथग्रहण आजै गराउने तयारी छ । अहिलेसम्म खबरचाहिँ आएको छैन ।”