काठमाडौं । सत्तारूढ नेपाल कम्युनिस्ट पार्टी (एमाले)का नेता गोकर्ण विष्टले पार्टी अध्यक्ष केपी शर्मा ओली समूहसँग गरेको वार्तालाई कमजोरीका रूपमा नबुझ्न आग्रह गरेका छन् । पार्टी केन्द्रीय सदस्यहरू (खनाल–नेपाल समूहको) भर्चुअल भेलामा उनले पार्टी एकता, कम्युनिस्ट आन्दोलनको रक्षा र विकास हुन्छ भने इमान्दार प्रयास किन नगर्ने भनेर संवादलाई निरन्तरता दिएको प्रष्ट्याएका हुन् ।
“हामीले हाम्रोतर्फबाट इमानदार प्रयास गरेका हौँ । यसको ध्येय आन्दोलन बचाउनु नै हो,” विष्टको भनाइ उद्धृत गर्दै एक नेताले भने, “वार्ता, संवाद गर्नु गैरक्रान्तिकारी चरित्र होइन । यो स्वार्थवश गरिएको संवाद पनि होइन ।” उनले परिणाम निकाल्ने गरी वार्ता गरिएको पनि बताएका थिए ।
खनाल–नेपाल समूहले बिहीबारदेखि सुरु गरेको भर्चुअल छलफलमा शुक्रबार केन्द्रीय सदस्यहरूले धारण राख्ने क्रम सकिएको छ । अहिले स्थायी कमिटी सदस्यहरू बोल्दै गरेको केन्द्रीय सदस्यहरू बताउँछन् । स्थायी कमिटी सदस्यहरूले बोल्ने पालो सकिएपछि नेता नेपालले निष्कर्षसहित आफ्ना कुरा राख्ने बताइएको छ ।