काठमाडौं । लुम्बिनी प्रदेशका नेपाली कांग्रेसका सांसद शंकर गिरीले मुख्यमन्त्री शंकर पोखरलले आफूलाई केन्द्र सरकारको प्रवक्ता सम्झिएको आरोप लगाएका छन् । आजको प्रदेशसभा बैठकमा उनले प्रधानमन्त्री केपी शर्मा ओलीको चस्माले नहेर्न पोखरेललाई आग्रह पनि गरे ।
“मुख्यमन्त्रीजीले हेरिरहनुहुन्छ केपीजीको चस्माले । झापामा कुनै घटना घट्यो, मुख्यमन्त्रीको स्ट्याटस आउँछ । दार्चुलामा कुनै घट्ना घट्यो, मु्ख्मन्त्रीको स्ट्याटस आउँछ । मानौँ, मुख्यमन्त्री नै केन्द्र सरकारको प्रवक्ता हो । त्यो मनोरोगबाट मुक्त हुनुपर्छ,” उनले भने ।
प्रदेश सांसद गिरीले नेकपा (एमाले)का कार्यकर्ताहरुलाई कसैको दास नबन्न आग्रह गरे । उनीहरु दास बनिरहेको उनको आरोप थियो ।
त्यस्तै, उनले मुख्यमन्त्री पोखरेललाई राजीनामा दिएर गठबन्धनले प्रस्ताव गरेका नेकपा (माओवादी केन्द्र)का नेता कुलप्रसाद केसीलाई मुख्यमन्त्री बनाउन आग्रह गरे ।