काठमाडौं । नेकपा एमालेकी नेतृ रामकुमारी झाँक्रीले राष्ट्रपति विद्यादेवी भण्डारीले कोभिड–१९ विरुद्धको खोपका लागि विदेशी समकक्षीलाई गरेको पत्राचारप्रति आपत्ति जनाएकी छिन् । उनले मंगलबार सामाजिक सञ्जालमार्फत खोपका लागि पत्राचार गर्ने काम कार्यकारी प्रधानमन्त्रीको भएको बताएकी छन् ।
झाँक्रीले 'यो व्यवहार कतै समानान्तर सत्ताको अभ्यास त होइन ?' भन्दै प्रश्न पनि गरेकी छन् ।
“हाम्रो देशको राष्ट्रपति संस्था संविधानको संरक्षक र कानूनको परिपालक हो । उसका सम्पूर्ण क्रियाकलापलाई संविधानले सिमित गरेको छ । त्यसकारण लोकरिझाइँको लागि मित्र राष्ट्रका राष्ट्रप्रमुखलाई पत्राचार गर्ने होइन, त्यो काम त कार्यकारीको हो । यो व्यवहार कतै समानान्तर सत्ताको अभ्यास त होइन ? कि धुमिल भएको छवि बचाउने प्रपन्च हो ? प्रतिगमन पटक-पटक भोगेकै छौ नि होइन?,” उनले भनेकी छन् ।
पछिल्ला दिनमा राष्ट्रपतिले विदेशी सककक्षीलाई खोपका लागि फोन संवाद र पत्र पठाइरहेकी छन् । सो विषयमा केही नेताहरुले संविधान विपरीत भन्दै आलोचना पनि गरिरहेका छन् ।