काठमाडौं । विवेकशील साझा पार्टीको केन्द्रीय कमिटीले पार्टीका पूर्व संयोजक उज्वल थापाको निधनप्रति दुःख व्यक्त गर्दै शोक प्रस्ताव पारित गरेको छ । मंगलबार अपराह्न बसेको पार्टी केन्द्रीय कमिटीको आकस्मिक बैठकले थापाको स्मृति तथा सम्मानका लागि १३ औँ दिनको पुण्य तिथिमा पार्टीका प्रत्येक सदस्य र शुभचिन्तकहरूलाई कम्तीमा एउटा वृक्षारोपण गर्न पनि आह्वान गरेको छ । 

साथै, पार्टीलले यही बिचमा पार्टीमा ‘उज्वल थापाको जीवन र विचार’ विषयमा छलफल र बहस पनि चलाउने भएको छ । 

“नेपालमा वैकल्पिक राजनीति स्थापित गर्न उल्लेख्य भूमिका खेलेका थापाको निधनले राष्ट्रिय राजनीतिमा अपूरणीय क्षति पुगेको छ । खास गरी शान्तिपूर्ण र रचनात्मक प्रदर्शनका माध्यमबाट राजनीतिक, सामाजिक, आर्थिक, जनस्वास्थ्य सरोकार लगायतका मुद्दामा दलहरूले नागरिकको समर्थन हासिल गर्ने र सुधारात्मक कदमको लागि राज्यलाई दबाब दिने विधि स्थापित गर्न उहाँको अहम् भूमिका छ,” पार्टीले जारी गरको विज्ञप्तिमा भनिएको छ ।

थापाले अङ्गालेको सुसंस्कार, अहिंसा र निष्ठाको मार्गलाई विवेकशील साझा पार्टी अविचलित र प्रतिबद्ध भएर अवलम्बन गर्दै अगाडी बढ्ने पनि विज्ञप्तिमा भनिएको छ ।

उनको मंगलबार अपराहृन ४ बजेर २५ मिनेटमा निधन भएको हाे ।