काठमाडौं । जनता समाजवादी पार्टी ८ मन्त्री र २ राज्यमन्त्रीसहित सरकारमा जाने भएको छ । आज बालुवाटारमा प्रधानमन्त्री तथा नेकपा एमालेका अध्यक्ष केपी शर्मा ओलीसँग जसपाका अध्यक्ष महन्थ ठाकुर, नेताहरु राजेन्द्र महतो, लक्ष्मणलाल कर्ण लगायतले छलफल गरेका थिए । छलफलमा अहिलेसम्म भएका कामको समीक्षा भएको नेता कर्णले जानकारी दिए । 
 
उनले आफ्नो पार्टीमा छलफल गरेपछि मात्रै सरकारमा जाने विषयमा टुङ्गो लाग्ने बताए । “सरकारमा आउन त प्रधानमन्त्रीजीले सुरुदेखि नै भनिराख्नु भएको छ । मन्त्रालयका विषयमा ८ मन्त्री र २ राज्यमन्त्री भनेर अस्तिदेखि नै भन्नुभएको छ ।  हाम्रो पाटीभित्र विवाद छ । छलफल भएको छैन । हामीभित्र छलफल गर्छौैं त्यसपछि मात्रै कुन मन्त्रालय लिएर जाने भन्ने कुरा टुंगो लाग्ला,” उनले भने ।
 
उनले सिङ्गो पार्टीको विवाद तत्कालै समाधान नहुने भएकाले आफ्नो समूहभित्र मात्रै छलफल हुने बताए । संविधान संशोधनका लागि सरकारले ५ सदस्यीय कार्यदल बनाएको छ । पार्टीका अध्यक्ष उपेन्द्र यादव पक्ष सरकारमा नजाने र ठाकुर पक्ष सरकारमा जाने पक्षमा छ ।
 
पार्टीको विवाद उत्कर्षमा पुगिरहेका बेला जसपाको ठाकुर पक्ष सरकारमा जान लागेको हो ।