काठमाडौं । नेकपा एमालेले सुदूरपश्चिमका तीन मन्त्री र तीन राज्यमन्त्रीसहित सातजनालाई कारबाहीको सिफारिस गरेको छ । प्रदेश कमिटीले स्पष्टीकरण सोधे पनि जवाफ नआएपछि आवश्यक कारबाहीका लागि पार्टी केन्द्रमा सिफारिस गरेको प्रदेश कमिटीका सचिव राजेन्द्र रावलले जानकारी दिए ।
भौतिक पूर्वाधार विकासमन्त्री दीर्घबहादुर सोडारी, सामाजिक विकासमन्त्री लालबहादुर खड्का, आन्तरिक मामिला तथा कानुन मन्त्री पूर्णा जोशी, भौतिक पूर्वाधार विकास राज्यमन्त्री चुनकुमारी चौधरी, सामाजिक विकास राज्यमन्त्री मनाकुमारी साउद र आर्थिक मामिला राज्यमन्त्री अर्चना गहतराज कारबाहीमा पर्ने भएका हुन् ।
त्यस्तै एमाले प्रदेशसभाकी सचेतक दुर्गाकुमारी कामीलाई पनि कारबाहीको सिफारिस गरेको रावलले जानकारी दिए ।
भोलि बालुवाटारमा बस्ने स्थायी कमिटी बैठकले उनीहरुको कारबाहीबारे निर्णय गर्नेछ । पार्टी केन्द्रको निर्णय विपरित सरकारको समर्थन निरन्तरता दिएको भन्दै एमालेले यसअघि सरकारका मन्त्री तथा प्रदेश संसदीय दलका नेतासहित तीनजनालाई साधाराण सदस्यबाट हटाइसकेको छ ।
