काठमाडौं । प्रधानमन्त्री केपी शर्मा ओलीले मुलुकको राजनीतिमा जन्डिसको बिरामीले जस्तो जता पनि पहेँलो देख्ने प्रवृत्तिहरु देखा परेको बताएका छन् ।
शुक्रबार सिंहदरबारमा प्रधानमन्त्रीको पदभार ग्रहण पछि बसेको मन्त्रिपरिषद्को बैठकलाई सम्बोधन गर्दे उनले विरोधीहरुले सरकारका उचित प्रयासहरुलाई भ्रमपूर्ण ढंगले प्रचार गरी जनतामा अन्योल सिर्जना गर्ने काम भएको बताएका छन् ।
उनले कोभिड १९ संक्रमणको भयावह अवस्थामा त्यसविरुद्धको लडाईँमा एकजुट हुनुपर्नेमा सरकारका प्रयासहरुलाई ओझेल पार्ने र जनतामा निरासा पैदा गर्ने काम भएको दाबी गरे ।
उनले जन्डिसको बिरामीले जता पनि पहेँलो देखे जस्तै सबै ति भ्रष्टाचार देख्ने र काम गर्ने संस्था र व्यक्तिलाई हतोत्साही गर्ने काम भएको बताए ।
उनले भने, “कोभिड १९ का विरुद्ध एकजुट भएर लड्नुपर्ने बेलामा विभिन्न प्रकारले अस्वस्थ्य, अनुचित र तनावग्रत वातावरण बनाउने र जनतामा अन्योल सिर्जना गर्ने, निरासा पैदा गर्ने, सरकारका प्रयासहरुलाई ओझेलमा पार्न खोज्ने, प्रयासहरुलाई असफल पार्न खोज्ने, उचित प्रयासहरुलाई भ्रमपूर्ण ढंगले प्रचार गर्ने र जन्डिसको बिरामीले जस्तो जता पनि पहेँलो देख्ने, जता पनि भ्रष्टाचार देख्ने र काम गर्ने संस्था र व्यक्तिलाई पनि काम गर्न हतोत्साहित गर्ने प्रवृत्तिहरु भइरहेका छन् । ”
नेपाली कांग्रेस, नेकपा माओवादी केन्द्र र जसपाका अध्यक्ष उपेन्द्र यादवप्रति कटाक्ष गर्दै प्रधानमन्त्री ओलीले आफुले सरकार बनाउन नसकेपछि देशमा प्रतिगमन भएको देख्ने गरेको टिप्पणी गरे ।
त्यसकिसिमका आलोचनालाई उनले मुलुकमा अस्थिरता चाहनेहरुको कुतर्कको संज्ञा दिए ।
उनले भने, “यतिबेला पनि केही अस्थिरता चाहने र मुलुकमा शान्ति देख्न नचाहने तत्वहरुले लोकतान्त्रिक मुल्य मान्यता अनुसार संविधानन र कानुन बमोजिम देश चल्ने कुरालाई अस्वीकार गरेर आफ्ना स्वार्थमा केन्द्रित कुतर्क गर्छन् । अहिले पनि देशमा प्रतिगमन भएको देख्छन् । आफुले सरकार बनाउन नसक्नु प्रतिगमन । अर्कोले सरकार बनाउनु प्रतिगमन । यस्तो तथाकथित नक्कली क्रान्तिकारी चश्माबाट सधै हेर्छन् र अहिले पनि जनतालाई भ्रममा पार्न खोजिरहेका छन् । मुलुकमा प्रतिगमन भएको छ र प्रतिगमनका विरुद्ध लड्न सबै एकजुट भएर लागौ भनेर शान्ति कायम हुन नदिने स्थिरता हुन नदिने र अस्थिरता र अशान्तिको एउटा भुमण्डल खडा गर्न खोज्ने प्रयासहरु भएका छन् ।”
