काठमाडौं । नेकपा एमालेका अध्यक्ष केपी शर्मा ओली र नेता माधव कुमार नेपालबीच कार्यदल बनाएर विवाद साँघुर्‍याउने सहमति भएको छ । बिहीबार बूढानीलकण्ठस्थित एक व्यापारीको घरमा भएको छलफलमा २०७५ जेठ २ गतेको अवस्थामा फर्कने गरी कार्यदल बनाएर विवाद समाधान गर्ने सहमति भएको नेता नेपालले जानकारी दिए । 

“फागुन २८ र त्यसपछि भएका निर्णय फिर्ता गर्ने, सवोच्चको फैसला बमोजिम जेठ २ गतेको अवस्थामा पुर्‍याउने । पाटीलाई नयाँ ढंगले अघि बढाउने भनेर कुरा अघि बढाउने । राजीनामा दुई दिनलाई टर्‍याे । मिल्ने दिशामा अघि बढाउछौँ। अब कार्यदल बनाउँछौ” नेपालले सञ्चारकर्मीसँग भने ।

एमाले विवाद उत्कर्षमा पुगेका बेला दुई नेताबीच भएको छलफलले यस्तो निष्कर्ष निकालेको हो । 

एमालेको खनाल–नेपाल समूहले २०७५ जेठ २ गतेको पार्टीको संरचनामा फर्कनुपर्ने अडान राख्दै आइरहेको छ । ओली पक्षीय नेताहरुको बैठकले गरेको फागुन २८ गते र त्यसपछिका निर्णय फिर्ता हुनपर्ने उसको माग छ ।

 तर, ओलीले त्यसबाट फिर्ता नहुने अडान राखेपछि वैशाख ८ र ९ गते होटेल मेरियटमा भएको वार्ता विफल भएको थियो । उक्त वार्तापछि उनीहबीच आज भेट भएको हो । 

आजको भेटले विवाद समाधानको दिशातिर गएको नेता नेपालले बताए । आजको भेटमा सहमति नभए सांसदहरुले राजीनामा बुझाउने तयारी गरेका थिए । बहुमतको सरकारकार गठनका लागि विपक्षी गठबन्धनलाई सहयोग पुर्याउने गरी राजीनामा दिने उनीहरुको तयारी थियो । तर, आजको भेटले राजीनामा टारेको छ ।