गलेश्वर । शरीरमा अक्सिजनको कमी भएको समयमै थाहा नपाउँदा र समयमा नै अस्पतालमा गएर उपचार नगराउँदा म्याग्दीमा ज्यान गुमाउनेहरुको संख्या बढ्दै गएको छ । पछिल्लो एक सातायता म्याग्दीमा कोरोनाको लक्षण देखिएर ज्यान गुमाएकामध्ये धेरैमा श्वासप्रश्वासको समस्या देखिएको बेनी अस्पतालले जनाएको छ ।
बेनी अस्पतालका प्रमुख डा. जितेन्द्र कँडेलका अनुसार कोरोनाको दोस्रो लहरसँगै बेनी अस्पतालमा उपचारका लागि आउने कोरोना संक्रमितमध्ये अधिकांशको अवस्था चिन्ताजनक हुने गरेको र उनीहरुमा अक्सिजनको स्तर ३० देखि ५० प्रतिशतमा झरेको हुने भएकाले उपचारमा समस्या हुने गरेको छ ।
अस्पतालमा समयमा नै उपचारका लागि आउने बिरामीलाई कुनै समस्या नभएको बताउँदै अक्सिजनको मात्रा ६५ प्रतिशतसम्म भएका बिरामीलाई समेत उपचारपछि बुधबार डिस्चार्ज गरिएको डा. कँडेलको भनाइ छ । शरीरमा अक्सिजनको मात्रा ९० देखि १०० प्रतिशतसम्म राम्रो मानिने डा. कँडेल बताउँछन् ।
होम आइसोलेसनमा बसिरहेका बिरामीहरुको नियमित अक्सिमिटरले जाँच गर्नुपर्ने डा. कँडेलको सुझाव छ । घाँटी चिलाउने, खसखसाउने, खोकी लाग्ने, एक्कासि श्वासप्रश्वासको समस्या देखिनेजस्ता समस्या देखिएमा तत्कालै स्वास्थ्यकर्मीको सम्पर्कमा आउनुपर्ने उनले बताए ।
बुधबार बेनी अस्पतालमा मृत्यु भएका बेनी नगरपालिका–५ का ४१ वर्षीय पुरूषलाई श्वासप्रश्वासमा समस्या भएपछि मंगलबार राति उपचारका लागि अस्पतालमा ल्याइएको थियो । हाई फ्लो अक्सिजन दिएर उपचार गर्दा पनि बचाउन नसकिएको अस्पतालले जनाएको छ ।
कोरोना संक्रमणले सिकिस्त भएर अन्तिम अवस्थामा अस्पतालमा उपचार गर्न आएकाले बचाउन अनेक प्रयास गर्दा पनि नसकिएको अस्पताल व्यवस्थापन समितिका अध्यक्ष बेलबहादुर कटुवालले बताए । हिजो बुधबार मात्र म्याग्दीका तीन कोरोना संक्रमितको मृत्यु भएको छ ।
स्वास्थ्य कार्यालय म्याग्दीका अनुसार बुधबार साँझसम्म बेनी अस्पतालमा कोरोना पुष्टि भएका नौजनाको मृत्यु भएको छ । त्यसैगरी, जिल्लामा बिरामी भइ थप उपचारका लागि काठमाडौं र पोखरा गएका कोरोना संक्रमित पाँच र म्याग्दी स्थायी ठेगाना भइ काठमाडौं र पोखरालगायत सहरमा बसोबास गर्ने पाँच गरी वैशाख महिनामै १९ कोरोना संक्रमितको मृत्यु भएको छ । रासस