विराटनगर । कोरोना संक्रमण भयावह रुपमा बढ्न थालेपछि प्रदेश नम्बर–१ सरकारले अस्पतालहरुमा दुई हजार १०० बेडको थप्ने गृहकार्य सुरु गरेको छ । प्रदेशमा सञ्चालित ठूला अस्पतालहरुमा कोरोना संक्रमितको उपचारका लागि बेड संख्या थप्न लागिएको हो ।
केन्द्र सरकारसँग सहयोग, समन्वय र अनुमतिका लागि प्रदेशस्तरीय कोभिड–१९ संकट व्यवस्थापन समिति (पीसीसीएमसी) ले प्रस्ताव गर्नेछ । धरानस्थित बीपी कोइराला स्वास्थ्य विज्ञान प्रतिष्ठान, विराटनगरस्थित विराट मेडिकल कलेज शिक्षण अस्पताल, नोबेल मेडिकल कलेज शिक्षण अस्पताल र झापास्थित बीएन्डसी अस्पतालमा कम्तीमा ५००/५०० बेड क्षमताको तथा न्युरो, कार्डियो तथा मल्टि स्पेसियालिटी अस्पतालमा १०० बेड क्षमताको कोभिड डेडिकेटेड अस्पताल सञ्चालनका लागि सीसीएमसीसमक्ष प्रस्ताव गर्ने निर्णय भएको मुख्यमन्त्री तथा मन्त्रिपरिषद्को कार्यालयले जनाएको छ ।
यस्तै, निजी अस्पतालहरुलाई कोभिड उपचारमा दिइँदै आएको अनुदान रकम सम्बन्धमा अझ स्पष्ट बनाइ थप अनुदान उपलब्ध गराउन र गुणस्तरीय सेवा प्रवाह गर्ने वातावरणका लागिसमेत केन्द्र सरकारसमक्ष लेखी पठाउने निर्णय गरिएको जनाइएको छ ।
