काठमाडौं । पूर्वराजा ज्ञानेन्द्र शाहको स्वास्थ्य अवस्थामा निकै सुधार भएको छ । उनको दुई दिनअघि पुनः स्वाब परीक्षण गरिएको र त्यसको रिपोर्ट नेगेटिभ आएको अस्पतालले जनाएको छ ।
उनी काठमाडौंको थापाथलीस्थित नर्भिक अस्पतालमा उपचाररत छन् । स्वाब रिपोर्ट नेगेटिभ आएपछि अक्सिजनको सपोर्टमा रहेका उनलाई अक्सिजन दिन छाडिएको छ । उनको अवस्था अहिले सामान्य छ ।
सोही अस्पतालमा उपचाररत पूर्वरानी कोमल शाहको स्वास्थ्य अवस्थामा लगातार सुधार भइरहेको जनाइएको छ ।
कोरोना संक्रमण भई १८ दिनअघि नर्भिक अस्पतालमा भर्ना भएकी शाहलाई त्यसको केही दिनपछिदेखि प्लाज्मा थेरापी विधिबाट उपचार थालिएको थियो । उनको अवस्थामा सुधार भएपछि केही दिनअघिदेखि नै आईसीयूबाट वार्डमा सारेर उपचार जारी राखिएको छ ।
पछिल्लो समय उनलाई दिइँदै आएको अक्सिजनको मात्रा समेत घटाउँदै लगिएको छ । उनको अवस्थामा दैनिक र क्रमिक सुधार भइरहेको अस्पतालले जनाएको छ ।
यस्तै, पूर्वअधिराजकुमारी प्रेरणा शाहको कोरोना रिपोर्ट यसअघि नै नेगेटिभ आइसकेको छ ।