काठमाडौं । कोरोका संक्रमणको जोखिम कम गर्न जारी गरिएको निषेधाज्ञाको प्रभाव देखिन थालेको छ । निषेधाज्ञा जारी भएको दुई साता नबित्दै न्यून आयस्रोत भएकाहरू सडकमा देखिन थालेका छन् ।

सोमबार काठमाडौंको ठमेलको सडक किनारमा रौतहटका अब्दुल्ला माग्न बसेको अवस्थामा भेटिए । उनी आफ्नो चार वर्षीय छोरीलाई काखमा राखेर मागिरहेका थिए ।

उनी श्रीमती र चारजना सन्तासहित ललितपुरको बालकुमारीमा भाडामा बस्ने गर्थे । गत वर्षको लकडाउनमा उनी घर फर्किए । पछि अवस्था सामान्य भएपछि उनी काठमाडौं फर्किए । 

तर उनले पहिलेजस्तो कमाइ गर्न सकेनन् । कमाइ नभएर भाडा तिर्न नसकेपछि उनले बसरिहेको कोठा छोड्नुपर्‍यो । त्यसपछि उनी काठमाडौंको धल्कोमा सरे । कारखानामा सिलाईको काम गर्ने अब्दुल्ला निषेधज्ञाका कारण काम बन्द भएपछि उनी सडकमा माग्न विवश बनेका रहेछन् ।

अब्दुल्लाको श्रीमती प्यारालाइसिसबाट ग्रसित छिन् । घरमा सहयोग स्वरूप पाएको चामल त रहेछ तर खाना बनाउन ग्यास रहेनछ । त्यसैले उनी प्यारालाइसिस भएकी आफ्नो श्रीमती र तीन जना सन्तानलाई कोठामै छोडेर खानाको खोजीमा उनी सडकमा आएका रहेछन् ।

तस्बिरहरू : सुनिल प्रधान