काठमाडौँ । नरदेवी आयुर्वेद अस्पतालमा अक्सिजनसहितको एचडीयू (हाई डिफिसेन्सी युनिट) सेवा र आइसोलेसन केन्द्रसञ्चालन गर्न काठमाडौं महानगरपालिकाले अनुदान सहयोग गर्ने भएको छ ।
सो सम्बन्धमा महानगरका प्रमुख विद्यासुन्दर शाक्यको रोहबरमा आज महानगरका तर्फबाट जनस्वास्थ्य विभागका प्रमुख हरिबहादुर कुँवर र अस्पतालका निर्देशक डा. प्रदीप केसीले सम्झौतापत्रमा हस्ताक्षर गरे ।
सम्झौताबमोजिम अस्पतालले आफूसँग रहेका भौतिक पूर्वाधार, मौजुदा जनशक्ति र अन्य साधन–स्रोतको उपयोग गरेर अक्सिजनसहितको एचडीयू सेवा र आइसोलेसन केन्द्र सञ्चालन गर्नेछ भने महानगरले यसका लागि आवश्यक खर्च अनुदानका रुपमा उपलब्ध गराउनेछ ।
अस्पतालमा अक्सिजनसहितको एचडीयू सेवा र आइसोलेसन केन्द्र चलाउन पाइपलाइनसहितको अक्सिजन वितरण प्रणाली विकास गर्ने, अस्पतालको मर्मत–सम्भार तथा रङरोगन गर्ने, आवश्यक थप जनशक्ति व्यवस्थापन गर्नेजस्ता पूर्वाधार तयार गरेर आउँदो जेठ १ गतेबाट सञ्चालनमा ल्याइने जनाइएको छ । उपचारमा खटिएका जनशक्तिहरुलाई प्रोत्साहन भत्ता, बिरामीहरुका लागि खाना, खाजालगायतका खर्च महानगरको अनुदान रकमबाट व्यहोरिनेछ ।
अस्पताललाई स्वास्थ्य तथा जनसंख्या मन्त्रालयबाट प्राप्त रकममा नपुगेको रकम शोधभर्नास्वरुप महानगरले उपलब्ध गराउनेछ । पहिलो चरणमा ५० बेडबाट अक्सिजनसहितको आइसोलेसन सेवा सुरु गरेर यसलाई विस्तार गर्दै लैजाने सहमतिपत्रमा उल्लेख छ ।
