काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले प्रधानमन्त्री केपी शर्मा ओलीलाई राजीनामा दिएर नयाँ सरकार गठनको बाटो खोलिदिन आग्रह गरेका छन् ।
सोमबार सदनमा प्रधानमन्त्री ओलीको विश्वासको मतको प्रस्तावको विपक्षमा बोल्दै अध्यक्ष प्रचण्डले फागुन ११ गते प्रतिनिधिसभा पुनःस्थापना भएपछि पनि राजीनामा दिन सुझाएको बताए । “मैले त्यतिबेला पनि उदाहरण दिँदै भनेको थिएँ, इनफ इज इनफ, प्रधानमन्त्री ओलीले राजीनामा दिएर नयाँ सरकार गठनको बाटो खोल्नु नै उपयुक्त हुन्छ,” उनले भने ।
उनले निर्वाचित सरकार पाँचै वर्ष चल्नुपर्ने मान्यतामा आफू अहिले पनि रहेको र विचमै सत्ता परिवर्तन गर्दा अराजकता भित्रिएको पनि बताए ।
उनले ओली सरकारलाई समर्थन आफैँले गरेको बताउँदै उनले संघीयता क्षतविक्षत पारिएको र संविधानलाई कोरोना लागेर आइसीयूमा उपचार गराइरहेजस्तो देखिन पुगेको भन्दै चिन्ता व्यक्त गरे ।
उनले आफू परिवर्तनको पक्षधर भएकोले अहिलेको बेथितिले चिन्तित तुल्याएको बताए ।