काठमाडौं । नेकपा एमालेका उपाध्यक्ष वामदेव गौतम नेपाल कम्युनिस्ट पार्टी (नेकपा) राजनीतिक रुपमा विभक्त हुँदा कुनै पक्षमा जान चाहेनन् । उनले पार्टी एकताको राष्ट्रिय अभियान सञ्चालन गरे । यतिबेला नेकपा एमाले पनि फुटको डिलमा छ । आज एमालेका अध्यक्ष तथा प्रधानमन्त्री केपी शर्मा ओलीले संसदमा विश्वासको मत लिँदैछन् । एमालेका वरिष्ठ नेता झलनाथ खनाल र नेता माधवकुमार नेपाल पक्षका सांसदहरुले आजको बैठकमा नै अनुपस्थित हुने निर्णय गरिसकेका छन् ।
उनीहरुले विश्वासको मत लिनु अगावै राजीनामा दिने भने पनि राजीनामाबाट ‘ब्याक’ भएका छन् । पार्टी एकताकै पक्षमा नै रहेको खनाल–नेपाल पक्षका नेताहरु बताइरहेका छन् ।
यस्तैमा पार्टीलाई एक गराउने अभियानमा एकता राष्ट्रिय अभियानका संयोजक गौतमले नै खनाल–नेपाल समूहले पार्टी फुटाए त्यसमा सामेल हुने घोषणा गरेका छन् । उनका प्रेस सहयोगी विश्वमणि सुवेदीले फेसबुकमा राखेको विज्ञप्ति अनुसार ४० प्रतिशत पुर्याएर एमाले विभाजन गरे वामदेव त्यस पार्टीमा सामेल हुनेछन् । तर, पार्टीमा समानान्तर गतिविधिमा भने उनको असहमति नै रहेको बताएका छन् ।
“वरिष्ठ नेता क।माधवकुमार नेपाल, झलनाथ खनाललगायत नेता कमरेडहरुले नेकपा एमालेमै भएर समानान्तर गतिविधि गर्ने, कमिटीहरु बनाउनेजस्ता काममा मेरो सहमति छैन । तर, यदि उहाँहरुले चाहे संसदको ४० प्रतिशतसहित वा त्यो बाहेकको अवस्थामा पनि पार्टी विभाजन गरेर जानुहुन्छ भने म त्यो पार्टीमा सामेल हुनेछु,” गौतमको भनाइ छ ।
उनको यो भनाइले पार्टी एकताका पक्षमा रहेका गौतम फुटको पक्ष पोषक बनेको देखिन्छ । एमालेका आम नेता कार्यकर्ता एकताकै पक्षमा रहेको बताइरहेका बेला गौतमको भने फुटलाई प्रश्रय दिने अभिव्यक्ति आएको हो ।
तर, खनाल–नेपाल समूहले अर्को पार्टी गठन गर्ने विषयमा पनि छलफल गरेको भने बताइन्छ ।
गौतमले पार्टीका अध्यक्ष तथा प्रधानमन्त्री केपी शर्मा ओलीको पक्षमा नरहेको स्पष्ट पारेका छन् । उनले ओलीले २०७५ जेठ २ गतेमा फर्कन अस्वीकार गरेकाले त्यसमा सहयोग गर्न नसक्ने बताएका हुन् ।
“पार्टी अध्यक्ष तथा प्रधानमन्त्री केपी शर्मा ओलीसँग उहाँले नेकपा एमालेको स्थिति २०७५ जेठ २ गतेसम्मको मानेर अगाडि बढ्नुपर्छ भन्ने आग्रह राख्नुभयो । तर, अध्यक्षले भन्नुभयो, ‘म ०७५ जेठ २ भन्दा धेरै अगाडि बढिसकेँ । त्यसैले म त्यस्तो काम गर्न सक्ने छैन,” वक्तव्यमा प्रधानमन्त्री भनाइ उदृत गरेका छन् ।
त्यसैले ओलीलाई साथ दिन नसक्ने बताएको सुवेदीले उल्लेख गरेका छन् ।