काठमाडौं । बर्दियामा स्रोत नखुलेको १७ लाख ५० हजार भारतीय रुपैयाँसहित एकजना पक्राउ परेका छन् ।

राजापुर नगरपालिका–४, सत्तीघाटबाट सो रकमसहित कैलालीको टीकापुर नगरपालिका–१ बस्ने २९ वर्षीय गोपाल चौधरीलाई प्रहरीले पक्राउ गरेको हो ।

कैलालीबाट राजापुरतर्फ जाँदै गरेको सुदूरपश्चिम प्र.०१००८ प ८१४५ नम्बरको मोटरसाइकललाई इलाका प्रहरी कार्यालय राजापुरबाट खटिएको प्रहरीले जाँच गर्ने क्रममा मोटरसाइकल चालक चौधरीलाई उक्त स्रोत नखुलेको भारतीय रुपैयाँसहित फेला पारी पक्राउ गरेको हो । उनको साथबाट एकथान ल्यापटप, एकथान मोबाइलसहित सिमकार्ड समेत प्रहरीले बरामद गरेको छ ।

उनलाई आवश्यक कारबाहीको लागि राजस्व अनुसन्धान कार्यालय कोहलपुर, बाँके पठाइएको जिल्ला प्रहरी कार्यालय बर्दियाले जनाएको छ ।