काठमाडौं । नेकपा (एमाले)का नेता माधवकुमार नेपालले मध्यरात प्रधानमन्त्री तथा पार्टी अध्यक्ष केपी शर्मा ओलीलाई ६ बुँदे आग्रहसहितको पत्र पठाएका छन् । आइतबार दिउँसो वरिष्ठ नेता झलनाथ खनाल र नेता नेपाल समूहका सांसदहरूको झण्डै चार घण्टा लामो बैठक बसेको थियो । पार्टी अध्यक्ष ओली सहमतिमा नआएको भन्दै प्रतिनिधिसभा सदस्यबाट सामूहिक राजीनामा दिने प्रयोजनका लागि बसेको भए पनि थप १३ घण्टा बाटो हेर्ने अल्टिमेटम लम्ब्याएको थियो ।
नेता नेपालले त्यही बैठकको मर्म र भावना अनुसार अध्यक्ष ओलीलाई सम्बोधन गरेर पत्र पठाएका छन् ।
“तपाईंले प्रतिनिधि सभामा वैशाख २७ गते विश्वासको मत लिने कुरा गर्नुभएको छ । यस्तो विषयमा समेत तपाईंले पार्टीभन्दा बाहिर समर्थनको लागि अनुनय, विनय गर्नुभयो भने पार्टीमा आफ्नो गुटबाहेकको पंक्तिप्रति शत्रुवत् व्यवहार देखाइरहनु भएको छ । तपाईंले वार्ता गर्ने वा पार्टी एकता गर्ने भनेर आफू निकट व्यक्तिहरूलाई खटाएझै गर्नुभएको काम कति नक्कली रहेछ भन्ने यही वैशाख २६ गते दिनुभएको अहंकार र विद्वेषपूर्ण वक्तव्यबाट छर्लङ्ग हुन्छ । वक्तव्यमा तपाईंले आफ्ना पार्टीको सिद्धान्त, विधान र नीति विरोधी क्रियाकलापहरूमा पर्दा हाल्न अरूमाथि प्रहार गर्नुभएको छ । यस्तो स्थितिमा निम्नलिखित कुराहरूको आधारमा मात्र तपाईंले विश्वासको मत लिने निर्णयबारे छलफल गरी निष्कर्षमा पुग्नसकिने यथार्थबारे जानकारी गराउन चाहन्छौं,” नेता नेपालले ६ बुँदे शर्त अघि सारेका छन् ।
शर्तमा फागुन २३ को सर्वोच्च अदालतको फैसला तथा पार्टीको विधान, नियमावली, आचार संहिता अनुरुप २०७५ साल जेठ ३ गते पार्टी एकीकरण हुनुपूर्वको अवस्थामा एमाले फर्काउनुपर्ने पूर्ववत माग अघि सारिएको छ ।
जेठ २ गतेको स्थितिमा पार्टी, जनसंगठन र पेशागत सगठनका सबै संरचनाहरूलाई केन्द्रदेखि स्थानीय तहसम्म क्रियाशील तुल्याउनुपर्ने बताइएको छ ।
“नवौं राष्ट्रिय महाधिवेशको मार्ग निर्देशन र पार्टीको विधान विपरीत २०७७ साल फागनु २८ गते गरिएका केन्द्रीय कमिटी विघटन गर्ने लगायतका निर्णय रद्द गर्नुका साथै त्यसको आधारमा त्यसपछि भएका सबै निर्णयहरु खारेज गर्ने, पार्टीलाई विधि, विधान र पद्धति अनुरुप सञ्चालन गर्ने । पार्टीमा उत्पन्न अन्तरविरोध, मतभेद र विवादका कारण सिर्जित समस्याहरू तथा एकअर्काप्रति लगाइएका आरोप–प्रत्यारोप एवम् समस्याहरुको बारेमा यथोचित समयमा समीक्षा गरी आवश्यक निर्णय गर्ने । सरकार र पार्टीको बीचमा समन्वय र सुसम्बन्ध कायम गर्दै पार्टीको सिद्धान्त, नीति, कार्यक्रम र देश तथा जनताको सर्वोपरी हित, अपेक्षा र आवश्यकता अनुसार सञ्चालन गर्ने । यस कुराहरूको आधारमा पार्टीलाई एकताबद्ध रुपमा अगाडि बढाउने । यथा समयमा राष्ट्रिय महाधिवेशन र विभिन्न तहका अधिवेशनहरू सम्पन्न गर्ने,” नेपालले अघि सारेका शर्तमा छन् ।
नेपालले लेखेको पत्र :