काठमाडौं  । सातको पहिलो कारोबार दिन आइतबार सेयर बजार परिसूचक नेप्से घटेको छ । गत बिहीबार २६३७.१३ अंकमा बन्द भएको बजार परिसूचक नेप्से आइतबार १८.५६ अंकले गिरावट हुँदा २६१८.५६ अंकमा बन्द भएको छ ।

आइतबार प्रि–ओपन सेसनमा नै दोहोरो अंकले बढेर २६५२.५८ अंकमा खुलेको नेप्से ‘इन्ट्रा–डे’ कारोबारमा उतारचढावबीच २६५२.६० अंकलाई नै उच्च बिन्दु कायम गर्दा २६१३.३२ अंकसम्म झरेको थियो ।

कोभिड प्रभाव तीव्र हुँदै गर्दा पछिल्लो केही दिनयता सेयर बजार लगातार घट्दो दिशामा देखिएको छ । देशभरको स्वास्थ्य अवस्था विकराल बन्दै गएको र अस्पतामा उपचार पाउन समस्या मुस्किल पर्ने अवस्था देखिदै गर्दा लगानीकर्ताहरुमा पर्खर हेरको अवस्था देखिन्छ । जसले गर्दा आजसम्म लगाातार चौथो दिन नेप्सेमा गिरावट देखिएको छ । केही लगानीकर्ताले यो संकटमा सेयर बेचरे नगदको जोहाे गर्न खोज्दा बजारमा सामान्य गिरावट आएको विश्लेषको बुझाइ छ ।

बजार परिसूचक घटेपनि कारोबार भने ६ अर्बमाथिको भएको छ । आज नेप्सेमा १ करोड २७ लाख २८ हजार  १२५ कित्ता सेयर किनबेच हुँदा ६ अर्ब १४ करोड ८९ लाख ६७ हजारको कारोबार भएको छ ।

नेप्सेमा सबै उपसूचकमा गिरावट हुँदा परिसूचक पनि ओरालो लागेको हो । बजारलाई लिड गर्ने बैंकिङ उपसूचक ०.०२ प्रतिशतको सामान्य करेक्सन भएपनि लघुवित्त उपसूचकमा १.७८ प्रतिशत, उत्पादन उपसूचक १.६१ प्रतिशत, व्यापार उपसूचक १.५९ प्रतिशत, अन्य उपसूचक १.३६ प्रतिशत, हाइड्रोपावर उपसूचक १.३१ प्रतिशत र होटेल तथा पर्यटन उपसूचकमा १.२८ प्रतिशतको करेसन भएको छ ।

आइतबार कारोबार रकममा एनसीसी बैंकले लिड गर्दा कुमारी बैंकले पछाएको छ । एनसीसी बैंकको सवार्धिक २८ करोड ८६ लाख ५२ हजार र कुमारी बैंकको २८ करोड ३४ लाख ५५ हजारको कारोबार भएको छ । नेप्सेमा करेक्सन भएपनि समाता घरेलु लघुवित्त र रुरु जलविद्युत कम्पनीको सेयर मुल्यमा सकारात्मक सर्किट लागेको छ ।

यस्तै कर्पोटे डेभलमेन्ट बैंकको सेयर मूल्य ४.६४ प्रतिशतले वृद्धि हुँदा राष्ट्रिय बिमा कम्पनीको सेयर मूल्य  ३.५५ प्रतिशत र बैंक अफ काठमाडौंको सेयर मूल्य २.९५ प्रतिशतले बढेको छ । यस्तै आज महिला लघुवित्त, विकाल बजार कम्पनी सिंगटी हाइड्रोपावर र युनियन हाइड्रोपावरको सेयर मूल्यमा नकारात्मक सर्किट लगेको छ । सपोर्ट माइक्रोफाइनान्सको सेयर मूल्य पनि ७.४४ प्रतिशतले घटेको छ ।

आज कारोबार भएका ३२ कम्पनीको सेयर मूल्य बढ्दा १४४ कम्पनीको घटेको छ । ८ कम्पनीको मूल्य भने स्थिर रह्यो ।