विराटनगर । प्रदेश नम्बर–१ का उद्योगी–व्यवसायीले कामदार, श्रमिक र कर्मचारीलाई कोरोनाविरुद्धको खोप उपलब्ध गराउन सरकारसँग माग गरेका छन् ।

उद्योग संगठन मोरङका अध्यक्ष सुयष प्याकुरेल, मोरङ व्यापार संघका अध्यक्ष प्रकाश मुन्दडा, विराट व्यापार संघका अध्यक्ष सुजन थापा र नेपाल उद्योग परिसंघका १ नम्बर प्रदेशका अध्यक्ष भीम घिमिरेले शनिबार संयुक्त विज्ञप्ति प्रकाशित गरी यस्तो माग गरेका हुन् ।

कोभिड–१९ को दोस्रो लहरसँगै संक्रमित र यसबाट मृत्यु हुनेको संख्या हरेक दिन बढिरहेको अवस्थामा औद्योगिक क्षेत्र प्रभावित बनेको विज्ञप्तिमा जनाइएको छ । “भ्याक्सिनबाहेक कोभिड–१९ को रोकथामको अन्य विकल्प नभएको प्रमाणित भइसकेकोले जिनी क्षेत्रका तर्फबाट भ्याक्सिनको सहज आपूर्तिको व्यवस्था मिलाउन नेपाल सरकारसमक्ष अनुरोध गर्दछौँ,” विज्ञप्तिमा भनिएको छ ।

विगतमा सरकारले उपलब्ध गराएको कोभिड–१९ विरुद्धको खोपको प्राथमिकतामा निजी क्षेत्र पर्न नसकेको जनाइएको छ । खोप आपूर्तिमा मूल्यलगायत मापदण्ड निर्धारण गरी निजी क्षेत्रलाई आह्वान गर्न समेत उद्योगी–व्यवसायीले माग गरेका छन् ।