काठमाडौं । कोरोना संक्रमितको उपचारका लागि अक्सिजन सिलिन्डरको अभाव भएपछि आह्वान गरिएको टेन्डरमा कसैले पनि सहभागिता जनाएन । अक्सिजन सिलिन्डरको आयातका लागि आह्वान गरेको टेन्डरमा कसैको पनि आवेदन नपरेपछि सरकारले पुनः टेन्डर आह्वान गर्ने तयारी सुरु गरेको छ ।

टेन्डर आह्वान गर्दा पनि कसैले सहभागिता नजनाएपछि स्वास्थ्य मन्त्रालयले छिमेकी मुलुक चीन र दातृ निकाय युनिसेफसँग सहयोगका लागि आग्रह गरेको छ । युनिसेफ र चीनलाई अक्सिजन सिलिन्डर तत्काल उपलब्ध गराइदिन मन्त्रालयले आग्रह गरेको छ । 

चीनले उपलब्ध गराउने २० हजार सिलिन्डरमध्ये ३ हजार ५०० सिलिन्डर छिट्टै आउने मन्त्रालयलेको दाबी छ । 

मन्त्रालयले युनिसेफलाई सिलिन्डरको व्यवस्थापन गरिदिन आग्रह गरेको छ । युनिसेफले पनि चीनबाटै ल्याएर सिलिन्डर उपलब्ध गराउने तयारी गरिरहेको छ । 

शुक्रबार स्वास्थ्य तथा जनसंख्यामन्त्री हृदयेश त्रिपाठीले स्वास्थ्य सचिव, स्वास्थ्य सेवा विभागका महानिर्देशक, व्यवस्थापन महाशाखाका निर्देशक, औषधि व्यवस्था विभागका महानिर्देशकसँग तत्काल आवश्यक स्वास्थ्य उपकरण र अन्य सामग्री तत्काल कसरी व्यवस्थापन गर्न सकिन्छ भनेर परामर्श गरेका थिए ।