काठमाडौं । नेपाली चलचित्रको आधा शताब्दी लामो इतिहास रहे पनि अझै नेपाली सीमा पार गर्न सकेको छैन । कारण सिनेमाको विश्व भाषामा नेपाली चलचित्र बन्न नसक्नु नै हो ।
चलचित्रकर्मीहरुकै शब्द सापट लिने हो भने बम्बइया फर्मुलामा चलचित्र बन्नु हो । भीडमा अलग हुने प्रयास नगर्नु र हिन्दी चलचित्रकै नक्कल गरेर बनाइएका कारण नेपाली चलचित्र विदेशी बजारमा जान नसकेको नेपाली फिल्म मेकरहरुले नै बताउँदै आएका छन् ।
नेपालबाट टाढा होइन भारतीयहरुले पनि नेपाली चलचित्र हेर्दैनन् । दशकौं चलचित्रमा घोत्लिने, चलचित्र लेखिरहने भारतीय फिल्म मेकहरहरु पनि नेपाली चलचित्र हेर्दैनन् । उनीहरुका चलचित्रको ठूलो नभए पनि सानो बजार नेपाल भए पनि तिनै बलिउड फिल्म मेकरले पनि नेपाली चलचित्र नहेर्ने गरेको बताउँछन् ।
बलिउड फिल्म मेकर अनुराग कश्यप बिहीबार नेपाल इन्टरनेशनल फिल्म फेष्टिभल (निफ)मा सहभागी भएर आफ्नो फिल्मी करिअरको अनुभव सुनाउँदा उनले नेपाली चलचित्र खासै नहेर्ने बताए । उनले नेपाली चलचित्र मीन भामको ‘कालो पोथी’ र दीपक रौनियारको ‘ह्वाइट सन्’ हेरेको बताए । यसले पनि नेपाली चलचित्र गुणस्तरीय बन्दैनन्, त्यसैले धेरैले चासो दिँदैन भन्ने स्पष्ट पारेको छ । साथै इन्टरनेशनल बजारमा नगएसम्म विदेशी बजारले नेपाली चलचित्रबारे खासै चासो नदिने यसले प्रष्ट पार्छ ।