काठमाडौं । नेकपा एमाले विवाद निर्णायक मोडमा पुगेका बेला अर्थमन्त्री विष्णु पौडेल, सुरेन्द्र पाण्डे र गोकर्ण विष्टबीच आधा घण्टा कुराकानी भएको छ ।

नक्सालस्थित होटल मेरियटमा अपराह्न साढे चार बजेदेखि भएको कुराकानी ठोस निष्कर्षमा पुगेर नटुंगिए पनि संवाद आरम्भ भएको नेता सुरेन्द्र पाण्डेल बाह्रखरीलाई जानकारी दिए ।

“उहाँले चार बजे भेटौँ भन्नु भएको थियो,” पाण्डेले भने, “भेटमा ठोस प्रस्ताव केही थिएन । उही भेटौँ मात्रै भन्नु भएको थियो । म र गोकर्ण विष्ट गएका थियौँ । हामीले प्रष्ट ढङ्गले हाम्रा कुरा राख्यौँ । उहाँले छलफललाई निरन्तरता दिऔँ भन्नुभयो ।”

पाण्डेले आजको भेटले समस्याको हल नगरे पनि कुराकानी भने आरम्भ भएको बताए । अहिलेको समस्याको समाधानको विन्दु २०७५ जेठ २  नै भएकाले त्यहाँ फर्कन ओली राजी भए निकास निस्कने कुरा दोहोर्‍याएको पाण्डेको भनाइ  छ ।

वैशाख २७ को तिथि नजिकिँदै जाँदा राजनीतिक दौडधुप तीव्र बनेको छ । आजै साँझ कांग्रेस सभापति शेरबहादुर देउवा, एमाले नेता माधवकुमार नेपाल र भीम रावलबीच बूढानीलकण्ठमा संवाद भएको थियो ।