वासिङ्टन । अमेरिकसँग परमाणु सम्झौताको विषयमा वार्ता गर्ने विषयमा छलफल भइरहँदा इरानी सेनाले अमेरिकी संसद् भवन ध्वस्त गरेको भिडियो सार्वजनिक गरेको छ ।

इस्लामिक रिपब्लिक्स रिभोलुसनरी गार्ड्स कोर्प्स (आईआरजीसी)ले आइतबार सरकारी टेलिभिजनबाट 'प्रोपोगान्डा' गर्दै यस्तो भिडियो सार्वजनिक गरेको डेली मेलले जनाएको छ ।

भिडियोको सुरुमा आईआरजीसी सेना मार्चिङ गरिरहेको देखिन्छ । त्यसपछि कुनै अज्ञात स्थलमा मिसाइल प्रक्षेपण गरिएको र अमेरिकी संसद् भवन जलिरहेको देखिन्छ । भिडियोको अर्को दृष्यमा इरानी सेना जेरुसेलमतर्फ अघि बढेको देखिन्छ ।

इरान र अमेरिकाबीच परमाणु सम्झौताका विषयमा वार्ता हुने समाचार बाहिरिइरहेका बेला इरानले यस्तो भिडियो सार्वजनिक गरेको हो । भिडियोको पृष्ठभूमिमा बजेको गीत इरानी राष्ट्रगान रहेको टोनी ब्लेयर इन्स्टिच्युटका विश्लेषक कसरा अरबीले बताए ।

उनका अनुसार गीतका शब्दमा अमेरिकी संसद्लाई ‘उत्पीडनको दरबार’सँग तुलना गरिएको र जेरुसेलमलाई इरानले स्वतन्त्र बनाउने बताइएको छ । सन् १९७९ को इस्लामिक रिभोलुसनपश्चात इरानले इजरायललाई आफ्नो शत्रु मान्दै आएको छ ।

भिडियोमा प्रतिक्रिया जनाउँदै रिपब्लिकन सांसद् प्याट टुमीले राष्ट्रपति डोनाल्ड ट्रम्प प्रशासनले इरानमाथि लगाएको आर्थिक प्रतिबन्ध कायम राख्न माग गरेका छन् ।