काठमाडौं । कुशल भुर्तेल पछिल्लो समय चर्चामा छन् । लामो समय घरेलु क्रिकेटमा बेग्लै पहिचान बनाएका कुशलले नेपाली राष्ट्रिय टोलीमा डेब्युमै चमत्कार देखाए ।

हालै सम्पन्न त्रिकोणात्मक ट्वान्टी–२० क्रिकेट सिरिजमा उनले उत्कृष्ट प्रदर्शन गरे । अहिले क्रिकेटमा उठ्ने ब्याटिङको एक उदाहरण बन्न सफल भएका छन्, कुशल ।

कुशल विश्व क्रिकेटको सर्वाेच्च निकाय आईसीसीले सार्वजनिक गरेको ‘प्लेअर आफ दी मन्थ’को मनोनयनमा समेत परेका छन् । यसअघि, आईसीसीले टी–ट्वान्टी क्रिकेटको ब्याटिङ वरीयता निकाल्दा उनी ६१औँ स्थानमा उक्लिएका थिए । त्यसअघि, उनी आईसीसीको वरीयतामा ९९औँ स्थानमा थिए ।

त्रिवि अन्तर्राष्ट्रि क्रिकेट मैदानमा भएको नेपाल, नेदरल्यान्ड्स र मलेसियाबीचको त्रिकोणात्मक टी–ट्वान्टी अन्तर्राष्ट्रिय खेलमा गरेको उत्कृष्ट प्रदर्शका कारण नै उनलाई यो सफलता मिलेको हो । डेब्यु खेलमा नै अर्धशतक प्रहार गरेर चर्चा बटुलेका उनी त्यसपछिका दुई खेलमा पनि अर्धशतक प्रहार गर्दै टी–ट्वान्टी अन्तर्राष्ट्रिय क्रिकेटमा डेब्युपछि लगातार तीन खेलमा अर्धशतक बनाउने विश्व क्रिकेटको पहिलो खेलाडी बने ।

पहिलो सिरिजमा नै मिलेको सफलता र विश्व वरीयता तथा मनोनयनमा पर्दा आफूमाथि झनै जिम्मेवारी थपिएको महसुस भएको उनले बताए । “क्रिकेट करियरको सुरुवातमा नै मनोनयनमा पर्दा धेरै खुसी छु । खुसीसँगै जिम्मेवारी थपिएको पनि महसुस भएको छ । जति–जति सफलता मिल्छ, त्यति नै जिम्मेवारी थपिदै जाने रै’छ,” कुशलले बाह्रखरीसँग भने ।

१७ अप्रिलमा डेब्यु गरेका कुशलले पहिलो खेलमा नेदरल्यान्ड्सविरुद्ध ६२ रन बनाए । दोस्रो खेलमा मलेसियाविरुद्ध ६१ रनमा अवजित रहेका उनले तेस्रो खेलमा पुनः नेदरल्यान्ड्विरुद्ध ६२ रनको योगदान गरे ।

यसअघि, नेपालको ओपनिङ ब्याटिङमा समस्या देखिँदै आएको थियो । कुशलले आसिफ शेखसँगै मिलेर त्यस समस्याको समधान पनि देखाइदिए । कुशल र आसिफले ओपनिङमा नयाँ जोडीको रुपमा नेपाली क्रिकेटमा ठाउँ बनाइसकेका छन् ।

क्रिकेट करियरमा अझै धेरै कुरा गर्न बाँकी रहेको उनी बताउँछन् । “अन्तर्राष्ट्रिय क्रिकेट करियर भर्खरै मात्र सुरुवात भएको छ । देशका लागि र क्रिकेटका लागि धेरै कुरा गर्न बाँकी छ । यस्तो खुसीहरू अझै दिलाउने मेरो लक्ष्य छ । सुरुवातमा नै मिलेको सफलताले आगामी दिनमा खेल्न हौसला त मिल्छ । यही सफलतालाई साथमा राखेर उत्कृष्ट प्रदर्शन गर्ने मेरो लक्ष्य छ,” उनले भने ।

नेपाली क्रिकेटमा कुशललाई ‘क्लासिक रन–मेसिन’ संज्ञा दिन थालिएको छ । दायाँहाते ब्याट्सम्यान कुशलले पछिल्लो पाँच खेलमा २७८ रन बनाए । उनको औसत ६९.५ छ भने स्ट्राइक रेट १४०.४ छ ।

कुशल आक्रामक मात्रै छैनन्, बीच–बीचमा रन चोर्न पनि माहिर छन । उनलाई नेपाली क्रिकेटको भविष्यको रुपमा हेर्न थालिएको छ । यसअघि, घरेलु प्रतियोगितामा निरन्तर खेल्दै आएका कुशलको प्रदर्शनबाट प्रशिक्षक, कप्तान र नेपाली क्रिकेट समर्थक उत्साहित देखिएका छन् ।

कुशलले हालसम्म लिस्ट ‘ए’का तीन खेलमा ३९ रन बनाएका छन् । कुशलले देखाएको पछिल्लो प्रदर्शनले नेपाली टोलीलाई ठूलो राहत दिएको छ ।

“नेपाली क्रिकेटले आफूबाट चाहेको प्रदर्शन दिन सकियोस् भन्ने मात्र छ । मिहिनेत गरेको थिएँ, सफलता मिल्दै छ । सबैतिरबाट आएको हौसला नै मेरो लागि अघिल्लो खेलमा राम्रो प्रदर्शन गर्ने चुनौतीका साथै अवसर पनि हो र म गरेर पनि देखाउनेछु,” कुशलले भने ।