विराटनगर । कोरोना संक्रमण बढ्न थालेपछि झापा र सुनसरीमा पूर्ण निषेधाज्ञा लागु गरिएको छ । जिल्ला प्रशासन कार्यालय सुनसरीले कोरोनाको दोस्रो लहर बढेर संक्रमित थपिन थालेपछि पूर्ण निषेधाज्ञा जारी गरेको छ । यसैगरी जिल्ला प्रशासन कार्यालय झापाले पनि पूर्ण निषेधाज्ञा लगाएको हो ।
सुनसरीका प्रमुख जिल्ला अधिकारी उमेश कुमार ढकालको अध्यक्षतामा बसेको डीसीसीएमसीको बैठकले वैशाख ३१ गते सम्मको लागि पूर्ण निषेधाज्ञा जारी गरेको हो । सुनसरीमा ५ सयभन्दा धेरै संक्रिय संक्रमित छन् । यसैगरी ९ जनाको मृत्यु भइसकेको जन स्वास्थ्य कार्यालयले जनाएको छ । प्रशासनले जोर/बिजोर प्रणालीबाट सञ्चालन हुँदै आएको सार्वजनिक तथा निजी यातायात बन्द गरिएको छ । अब अत्यावश्यक बस्तुका पसलहरू बिहान १० बजेसम्म मात्र सञ्चालन गर्न पाइने छ ।
झापा प्रशासनले कोरोना भाइरसको फैलावट रोक्न र चेन बे्रक गर्न पूर्ण निषेधाज्ञा लगाएको छ । बुधबार राति १२ बजेदेखि पूर्ण निषेधाज्ञा जारी हुनेछ । झापामा आइतबार रातिदेखि आंशिक निषेधाज्ञा जारी भएको थियो । प्रमुख जिल्ला अधिकारी श्रवणकुमार तिमल्सिनाले सर्वसाधारण आफै सचेत हुनुपर्ने र सरकारीले जारी गरेको नियमको पालना गर्नुपर्ने बताएका छन् । झापामा वैशाख ३१ गते राति १२ बजेसम्म पूर्ण निषेधाज्ञा लागु हुनेछ । अब पसल बजार, यातायात पूर्ण रुपमा बन्द हुनेछन् । झापामा संक्रमितको संख्या सात सय नाघिसकेको छ ।
निषेधाज्ञाको उलंघन गर्ने व्यक्तिलाई संक्रमण ऐन २०२० स्थानीय प्रशासन ऐन २०२८ अनुसार कारबाही गरिने प्रशासनले जनाएको छ ।