दाङ । दाङ घोराहीको एक जंगलमा मानव कंकाल भेटिएको छ । घोराही लेटार जनकपुरको जंगलमा भेटिएको उक्त कंकाल केही महिनादेखि हराइरहेका सञ्चारकर्मी देवेन्द्र ओलीको हुन सक्ने आशंका गरिएको छ । तर परिवारले भने अहिलेसम्म देवेन्द्रको कंकाल हो भनेर स्वीकार गरिसकेको छैन ।

कंकालको डीएनए परिक्षणबाट मात्रै यथार्थ थाहा हुने भन्दै परिवारले डीएनए परिक्षणको माग गरेको छ । कंकालसँगै ज्याकेट, घडी, जुत्ता भेटिएका छन् । ज्याकेट, घडी र जुत्ता भने देवेन्द्रकै हुन सक्ने उनका बुवा दाेर्ण अ‍ाेलीले बताए ।

"ज्याकेट, घडी र जुत्ता छोरा देवेन्द्रकै हो जस्तो देखिन्छ," देवेन्द्रका बुवा दोर्णले भने, "तर यी तीन चिजकै आधारमा छोराकै कंकाल हो भनेर भन्न सकिने अवस्था छैन ।"

उनकाअनुसार देवेन्द्रले प्रयोग गरेको मोबाइल र लगाएको सर्ट भने फेला परेको छैन । डीएनए परीक्षणबाट नै छोराको शव हो वा हैन भन्ने थाहा पाइने अन्यथा स्वीकार्न नसक्ने दोर्णको भनाइ छ ।

"डीएनए परीक्षणबाट मात्रै यथार्थ थाहा हुन्छ । त्यो नहुँदा सम्म छोराको शव हो भनेर हामीले स्वीकार्दैनौँ," दोर्णले भने, "डीएनए परिक्षणका लागि प्रकृया सुरु गर्ने भन्ने कुरा भएको छ ।"

गत माघ १५ गते घोराहीस्थित दिदीको घरबाट निस्केका देवेन्द्र त्यसयता बेपत्ता छन् । उनी दिदीको घरमा डेरा गरी बस्दै आएका थिए ।