एजेन्सी, पेरिस । फ्रान्समा जारी युरोपियन च्याम्पियनसिप (युरोकप) फुटबलको अन्तिम क्वाटरफाइनलमा आइतबार राती आयोजक फ्रान्स र ‘अण्डरडग’ आइसल्याण्डबीच प्रतिस्पर्धा हुदैछ । नेपाली समय अनुसार दुई टोलीबीचको खेल पौने १ बजे स्टे डी फ्रान्समा हुने छ । 

 

फ्रान्समा जारी १५ औँ सस्करणको युरोकपमा पोर्चुगल, वेल्स र जर्मनी सेमिफाइनल पुगिसकेको छ । र, आइतबार राती हुने आयोजक फ्रान्स र आइसल्याण्डबिचको बिजेता अन्तिम चारमा पुग्ने छ । अन्तिम क्वाटरफाइनलमा विजयी हुने टोलीले फाइनल प्रवेशका लागी विश्वकप बिजेता जर्मनीको सामना गर्ने छ ।

 

युरोकपको अन्तिम क्वाटरफाइनल खेल अन्य क्वाटरफाइनल जस्तै रोमान्चक हुने अपेक्षा गरिएको छ । किनकि युरोकपकै सफल टिम फ्रान्स र पहिलो सहभागितामै सनसनी नतिजा निकाल्दै आएको सानो राष्ट्र आइल्याण्ड खेल्दै छन् । त्यसैले अन्तिम क्वाटरफाइनलमा फ्रान्सलाई सानो प्रतिद्वन्द्वी भएपनि अण्डरडग आइल्याण्डविरुद्ध कठिन हुने अनुमान गरिएको छ ।

 

आइसल्याण्डविरुद्ध फ्रान्सले अहिलेसम्म ११ खेल खेलेको छ । जसमा ३ खेल बराबरी हुनु बाहेक अन्य ८ खेल फ्रान्सले जितेको छ । यस्तोमा कीर्तिमान तेस्रोपल्ट युरोकपको उपाधि जित्ने अभियानमा रहेको फ्रान्सलाई क्वाटरफाइनलमा बलियो टिम मानिएको छ र उसले ३ लाख ३० हजार मात्र जनसंख्या भएको देशलाई प्रतिद्वन्द्वी पाएको छ ।

 

तर, अन्तिम क्वाटरफाइनलमा आइसल्यान्डको सामना गर्दा फ्रान्सका प्रशिक्षक डिडियर डेसच्याम्पले इंग्ल्यान्डजस्तै सिकार हुनबाट जोगिन प्रयास गर्नेछन । पहिलोपल्ट ठूलो प्रतियोगिता खेलिरहेको आइसल्यान्डले अन्तिम १६ मा इंग्ल्यान्डलाई पराजित गर्दै इतिहास कायम गरेको थियो । त्यसैले पनि जसलाई पनि हराउन सक्ने अण्डरडग टोलि आइसल्याण्डले आफ्नो जितको संख्या थप्न सक्छ ।

यसपटक आइसल्याण्डलाई इन्ग्लिश प्रिमियर लिगमा लेस्टर सिटीको उपाधि सफलतासंग तुलना गरिदै आएको छ । इन्ग्लिश प्रिमियर लिगमा यस सिजन ठूला क्लबलाई पाखा लगाउदै लेस्टर सिटीले उपाधि जितेको थियो । र, अहिले आइल्याण्डको लय ठिक लेष्टर सितिकै जस्तो छ । यो कुरा फ्रान्स टोलीका खेलाडीले बुझेका छन् ।

 

“आइल्याण्ड यस युरो २०१६ मा लेष्टर सिटिजस्तै हुन,” फ्रान्सका राइट–ब्याक बाकारी साग्ना भन्छन , “उनीहरू त्यसका लागि योग्य छन् । उनीहरुको टिम स्तरीय छ र हामीले आइल्याण्डलाई बेवास्ता गर्नुहुन्न । किनकि नेदरल्यान्ड्स र चेक रिपब्लिक जस्ता ठूला टिमलाई हराएर उनीहरूले छनोटमै आफ्नो क्षमता देखाइसकेका छन् ।”

 

हुनपनि उत्तर एट्लान्टिक द्वीपको सानो टिम आइल्याण्डले समूह चरणको पहिलो खेलमा पोर्चुगल र दोस्रो खेलमा हंगेरीसँग १–१ को बराबरी खेलेको थियो । त्यसपछि समुह चरणको अन्तिम खेलमा अष्ट्रियालाई २–१ ले पराजित गरेको आइल्याण्डले अन्तिम १६ मा इंग्ल्यान्डलाई पनि त्यहि गोल अन्तरले पराजित गरेको थियो । त्यसैले आइसल्याण्डका संग्युक्त प्रशिक्षक हेइमिर हलग्रिम्सनले आफ्नो यात्रालाई लेष्टर सिटिकै जस्तो भएको बताउछन् ।

 

“फ्रान्स र आइसल्याण्डबीच ठूलो भिन्नता छ । यस खेलमा फ्रान्सलाई खेल गुमाउनु छैन र गुमायो भने फ्रान्स स्तब्ध हुनेछ,” प्रशिक्षक हलग्रिम्सनले भने, “हामीले ठूलो सपना देखेका छौ र हामीले राम्रो प्रदर्शन गर्नसके पनि आइसल्यान्डवासीलाई  खुसी मिल्नेछ । र, हामी युरोकप लेस्टर सिटिको जस्तै बनाउन चाहान्छौ ।”

 

यता, सन् १९८८ बाहेक सबै संस्करणमा फ्रान्सको उपस्थिति रहँदै आएको छ । त्यसमाथि यो पटक घरेलु मैदानमा फ्रान्सले युरोकप खेल्दै छ । सन् १९८४ मा मिचेल प्लाटिनीप्रेरित फ्रान्सले घरेलु मैदानमा युरोपियन च्याम्पियनसिप जितेको थियो । त्यसपछि फ्रान्सले सन् २००० को युरो जितेको थियो । त्यसैले त घरेलु मैदानमा समर्थक खुसी पार्न लेस ब्लुजलाई आइल्याण्डविरुद्ध जित्नै पर्ने दबाब छ । 

तर, पछिल्ला ठुला प्रतियोगितामा भने फ्रान्सले जितलाई निरन्तरता दिन सकेको छैन । सन् २००८ र २०१२ को युरोकपमा फ्रान्स क्वार्टरफाइनलबाटै बाहिरिएको थियो । तर, घरेलु मैदानमा जारी युरो जित्दै लेस ब्लुज तेस्रो पटक युरोकप उपाधि जित्न चाहन्छ । जुन प्रशिक्षक डिडियर डेसच्याम्पको लागी अवसर पनि हो ।

 

फ्रान्सले समूह चरणमा रोमानिया र अल्बानियालाई हराएको थियो । अन्तिम १६ मा एन्टोनी ग्रिजम्यानले पछाडि परेको स्थितिबाट उल्टाएर गणतन्त्र आयरल्यान्डविरुद्ध जित दिलाएका थिए । तरपनि प्रशिक्षक डेसच्याम्पलाई आफ्नो टोलीको अन्तिम समयको प्रदर्शनमा चिन्ता व्यक्त गर्छन ।

 

“मेरा खेलाडीलाई राम्रोसँग थाहा छ कि आइसल्याण्ड भाग्यले मात्रै यहाँसम्म आइपुगेको होइन । उनीहरुको यो यात्रा योग्य छ । त्यसैले हामीले त्यसलाई कसरी रोक्ने भन्नेबारे सोच्नुपर्छ, “प्रशिक्षक डेसच्याम्पले भने, “तर, हाम्रो एउटा समस्या छ । त्यो हामी सुरुवात राम्रो गर्छौं तर अन्त्यतिर खराब खेल्छौँ । यो हामीले सुधार्नु पर्छ ।”