वासिङ्टन । अमेरिकाले कोरोनाभाइरसविरुद्ध एष्ट्राजेनिका खोपको ६ करोड डोज अन्य देशलाई वितरण गर्ने भएको छ । भारतलगायत देशहरुमा संक्रमण तीव्र रुपमा बढेपछि अमेरिकाले अन्य देशहरुलाई खोप बाँड्ने जनाएको हो ।

भारतमा संक्रमितको संख्या बढेसँगै अमेरिकाले यसअघि नै भारतलाई औषधि उत्पादनका लागि आवश्यक पर्ने कच्चापदार्थ उपलब्ध गराउने जनाइसकेको छ ।

संघीय सुरक्षा समीक्षापश्चात आगामी महिनामा खोप निर्यात गरिने अमेरिकी राष्ट्रपति कार्यालय ह्वाइट हाउसलाई उद्धृत गर्दै बीबीसीले जनाएको छ ।

ह्वाइट हाउसका अनुसार आगामी हप्तासम्म यहाँको खाद्य तथा औषधि नियामक निकाय (एफडीए)ले खोपको समीक्षा गरेपछि एक करोड डोज खोप वितरण गरिनेछ । बाँकी ५ करोड खोप भने उत्पादनको चरणमा रहेको जनाइएको छ । अन्य देशहरुमा खोप अभाव भइरहँदा अमेरिकाले खोप सञ्चय गरेर राखेको भन्दै उसको आलोचना भइरहेको थियो ।

गत महिना राष्ट्रपति जो बाइडेनले एष्ट्राजेनिकाको करिब ४० लाख डोज खोप मेक्सिको र क्यानडालाई सहयोग गर्ने प्रतिबद्धता जनाएका थिए । ती दुवै देशले यो खोपलाई प्रयोगको अनुमति दिएका छन् ।