काठमाडौं । मन्त्रिपरिषद्को बैठकले २०० संक्रमित नाघेका पहाडी जिल्लाहरूमा निषेधाज्ञा जारी गर्न जिल्ला संकट व्यवस्थापन केन्द्र (डीसीसीएमसीलाई) अधिकार दिएको छ । आज बसेको मन्त्रिपरिषद् बैठकले ५०० संक्रमित नाघेका सहरी जिल्लाहरूमा निषेधाज्ञा जारी गर्ने विषयमा आवश्यक निर्णय लिन डीसीसीएमसीलाई अधिकार दिइएको कृषि तथा पशुपन्छी विकासमन्त्री पद्मा अर्यालले जानकारी दिइन् ।

आइतबार बसेको कोभिड संकट व्यवस्थापन केन्द्र (सीसीएमसी)ले सोही निष्कर्ष निकालेको थियो । पाँच सय संक्रमित नाघेका सहरी क्षेत्र, २०० संक्रमित नाघेका पहाडी जिल्लामा निषेधाज्ञा गर्नुपर्ने निष्कर्ष निकाल्दै सिफारिस गरेको थियो ।

आज बसेको मन्त्रिपरिषद् बैठकले त्यसलाई सदर गरेको हो । सीसीएमसीकै निष्कर्षअनुरूप उपत्यकालगायत कतिपय ठाउँहरूमा निषेध आदेश जारी भइसकेको छ । उपत्यकाका तीनै जिल्लामा १६ गते बिहान ६ बजेदेखि एक सातासम्म निषेध आदेश जारी गरिएको छ ।

त्यस्तै आज बसेको मन्त्रिपरिषद् बैठकले सबै तहका परीक्षा अनिश्चितकालसम्म रोक्ने निर्णय भएको अर्यालले बताइन् । उनकाअनुसार हवाइ उडान रोक्ने निर्णय भएको छैन । त्यसलाई व्यवस्थित गर्ने, जनस्वास्थ्य प्रोटोकल पालना भएनभएको अनुगमन गरिने उनले बताइन् । सीमा नाकालाई पनि व्यवस्थित गर्ने, आवागमन रोक्नुपर्ने ठाउँमा स्थानीय प्रशासनलाई नै त्यसको अख्तियारी दिने, हेल्थ डेस्कलाई व्यवस्थित बनाउने आदि निर्णय भएको उनले बताइन् ।