कोलम्बो । श्रीलंकामा तीव्र रूपमा फैलिन सक्ने कोरोना भाइरसको नयाँ स्ट्रेन भेटिएको छ । एक घण्टासम्म हावामा रहन सक्ने र तीव्र रूपमा फैलिने नयाँ भेरियन्ट भेटिएको श्री जयबर्धनपुरा विश्वविद्यालयको प्रतिरक्षा तथा आणविक विज्ञान विभागकी प्रमुख निलिका मलाविगेले बताइन् ।
“कोरोना भाइरसको यो भेरियन्ट श्रीलंकामा अहिलेसम्म पाइएको भेरियन्टमध्ये सबैभन्दा छिटो सर्ने हुने खालको छ । नयाँ स्ट्रेनले हावाबाट फैलने र झण्डै एक घण्टासम्म हावामा रहने क्षमता राख्छ,” मलाविगेलाई उदृत गर्दै इन्डिया टुडेले जनाएको छ ।
नयाँ वर्षको अवसरमा आयोजना गरिएका कार्यक्रमहरूका कारण नयाँ स्ट्रेन तीव्र रूपमा फैलिरहेको यहाँका स्वास्थ्य अधिकारीहरूले बताएका छन् । आगामी २–३ हप्ताभित्रमा स्थिति भयावह हुनसक्ने भन्दै जनस्वास्थ्य निरीक्षक उपुल रोहानाले चिन्ता व्यक्त गरेका छन् ।
खतरनाक स्ट्रेन भेटिएसँगै यहाँको स्वास्थ्य मन्त्रालयले कम्तीमा आगामी मे ३१ सम्म लागु हुनेगरी स्वास्थ्यका कडा मापदण्ड तयार गरेको छ । नयाँ मापदण्डअनुसार संस्थाहरूलाई आधा क्षमतामा मात्र सञ्चालन गर्न र भिडभाड हुने कुनै पनि कार्य नगर्न निर्देशन दिइएको समाचारमा जनाइएको छ । इन्डिया टुडेबाट