तेहरान । युरोपेली संघ (ईयू)ले इरानमा मानवअधिकारको दोहोरो मापदण्ड तय गरेको भन्दै ईयू परिषद्लाई पत्र लेखेको छ । परिषद्लाई औपचारिक पत्र लेख्दै इरानको मानवअधिकार उच्च परिषद्ले इरानी अधिकारी र संस्थामाथिको प्रतिबन्धलाई ईयूको दोहोरो मापदण्ड भनेको अलजजिराले जनाएको छ ।

सन् २०१९ नोभेम्बरमा भएको प्रदर्शनमा हिंसात्मक हस्तक्षेप गरेको भन्दै ईयूले इरानका आठ सैन्य र प्रहरी अधिकारी एवम् तीन कैदीबन्दीमाथि प्रतिबन्ध लगाएको थियो । ईयूले मानवअधिकार उल्लंघन गरेको आरोपमा हालसम्म ८९ इरानी अधिकारी र चार संस्थामाथि प्रतिबन्ध लगाएको छ ।

प्रतिबन्धले खाना र औषधि आयातमा मात्र नभई कोरोनाभाइरसविरुद्धको खोपको भुक्तानीमा समेत असर परेको पत्रमा उल्लेख गरिएको छ । इरानी बालबालिका, महिला, जेष्ठ नागरिक र शारीरिक रुपमा ‘असक्षम’ रहेकाको स्वास्थ्यमाथि खेलबाड गर्ने गरी ईयूले नियतवश प्रतिबन्ध लगाएको इरानको आरोप छ ।

ईयूका धेरै देशहरुले इरानसँग औषधि, मेडिकल सामग्री र खोपलगायत बिक्री गर्न अस्वीकार गरेको जनाउँदै इरानले मानवअधिकार उल्लंघनको दाबी गर्ने युरोपेलीहरु नै मानवअधिकार उल्लंघनमा दोषी रहेको आरोप लगाएको हो ।

इरानमा मानवअधिकारको दोहोरो मापदण्डका लागि ईयूलाई जवाफदेही बनाउने उद्देश्यले पत्र लेखिएको भन्दै इरानले मानवअधिकार, आतंकवाद, लागुऔषध, शरणार्थीलगायत विषयमा ईयूसँगको वार्तालाई तत्काल स्थगित गर्ने जनाएको छ ।