जकार्ता । दक्षिण–पूर्वी एसियाका नेताहरुले म्यानमारमा जारी संकट रचनात्मक रुपमा समाप्त गरिनुपर्नेमा सहमति जुटेको बताएका छन् । इन्डोनेसियामा सम्पन्न दक्षिण–पूर्वी एसियाली राष्ट्रहरुको संगठन (आसियान)को बैठकपछि नेताहरुले यस्तो धारणा सार्वजनिक गरेका हुन् ।

शनिबार भएको आसियनको शिखर बैठकमा म्यानमारका सेनाप्रमुख मिन आङ हेइङ पनि सहभागी भएका द गार्जियनले जनाएको छ । सम्मेलनपछि एक विज्ञप्ति जारी गर्दै नेताहरुले हिंसा अन्त्य गरी रचनात्मक छलफललाई अघि बढाउने सहमति भएको जनाएका हुन् ।

सम्बन्धित सबै पक्षसँग छलफल गर्न समूहले म्यानमारमा एक विशेष दूत नियुक्त गर्ने र घाइतेहरुलाई मानवीय सहायता प्रदान गर्ने विज्ञप्तिमा उल्लेख छ । यद्यपि, सम्झौतामा यो योजना कार्यान्वयन हुने समयसीमा निर्धारण गरिएको छैन । न त सेनाद्वारा भएको नागरिक हत्या वा हिरासतमा रहेका राजनीतिक बन्दीको रिहाइको विषयलाई नै विज्ञप्तिमा उल्लेख गरिएको छ ।

सम्मेलनले गरेको यो प्रयास नै म्यानमार संकटको समाधान खोज्नका लागि भएको पहिलो अन्तर्राष्ट्रिय प्रयास हो । सम्मेलनमा सहभागी मलेसियाका प्रधानमनत्री मुहिद्दिन यासिनले बैठक आफूहरुले अपेक्षा गरेभन्दा निकै फलदायी रहेको प्रतिक्रिया दिए ।

म्यानमारमा मानवअधिकारका लागि संयुक्त राष्ट्रसंघका विशेष प्रतिनिधि टम एन्ड्रयुजले आसियानका विशेष दूतसँग काम गर्न र शिखर सम्मेलनको परिणामको पर्यवेक्षण गर्न आफू निकै उत्सुक रहेको प्रतिक्रिया दिएका छन् ।

गएको फेब्रुअरी १ मा सेनाले सत्ताकब्जा गरेयता म्यानमार सैन्य जुन्टाले कम्तीमा ७४८ आम नागरिकको हत्या गरिसकेको मानवअधिकारसम्बन्धी संस्थाहरुले जनाएका छन् ।