काठमाडौं । सर्लाहीमा पेस्तोल र गोलीसहित एकजना पक्राउ परेका छन् । पक्राउ पर्नेमा चन्द्रनगर गाउँपालिका–२ बस्ने ३२ वर्षीय त्रिभुवन बैठा रहेका छन् ।

ईश्वरपुर नगरपालिका–१२ कालिन्जोर चोकबाट पक्राउ परेका उनको साथबाट मेडइन युएसए लेखिएको १ थान पेस्तोल, सोको ४ राउण्ड गोली र १ थान म्याग्जिन बरामद भएको प्रहरीले जनाएको छ ।  

बिआर ३० जेड ६५४८ नम्बरको मोटरसाइकललाई २ नम्बर प्रदेश प्रहरी कार्यालय जनकपुर र ईलाका प्रहरी कार्यालय केशरगंज सर्लाहीबाट खटिएको प्रहरीले जाँच गर्ने क्रममा मोटरसाइकल चालक बैठालाई हातहतियार सहित फेला पारी पक्राउ गरेको हो ।

हाल फरार रहेका मोटरसाइकलमा सवार सोही ठाउँ बस्ने ४० वर्षीय रामकेवल महतोको खोजी भइरहेको प्रहरीले जनाएको छ ।