पेरिस । जलवायु संकटको सामना गर्न जीवाश्म इन्धन उत्खनन रोक्नुपर्ने भन्दै नोबेल पुरस्कार विजेताहरूले विश्व नेतृत्वलाई कडा कदम चाल्न आग्रह गरेका छन् । विश्व पृथ्वी दिवसको पूर्वसन्ध्यामा विश्वका १०१ नोबेल पुरस्कार विजेताहरूले एक खुलापत्रमार्फ जीवाश्म इन्धन उत्खनन रोकेर नवीकरणीय उर्जामा लगानी बढाउनेतर्फ ठोस कदम चाल्न आग्रह गरेका हुन् ।
“जलवायु परिवर्तनका कारण करोडौँ जीवन जोखिममा छन् । हरेक महाद्वीपमा हजारौँ प्रजाति लोप हुने स्थितिमा छन्,” पत्रमा उल्लेख गरिएको छ, “कोइला, पेट्रोल र ग्यासजस्ता जीवाश्म इन्धन नै जलवायु परिवर्तनको मुख्य कारक हुन् ।”
उनीहरुले जीवाश्म इन्धन उत्पादन गर्ने उद्योगलाई निरन्तर विस्तारको अनुमति दिनु अनुचित हुने निष्कर्ष निकालेका छन् ।
उनीहरूले आश्रित अर्थव्यवस्थालाई तेल, ग्यास र कोइलाको विकल्प खोज्न सहयोग पुर्याउने रूपान्तरणकारी योजना बनाउन नेताहरूसँग आग्रह गरेका छन् । जसले विश्वलाई नै विश्वव्यापी न्यायको संक्रमणबाट समृद्ध बनाउने उनीहरूको ठहर छ ।
पत्रमा संयुक्त राष्ट्रसंघको जलवायु परिवर्तन सम्बन्धी पेरिस सम्झौतालाई निरन्तर समर्थन गर्नुपर्ने उल्लेख छ । यस्तै, उनीहरूले पेरिस सम्झौतामा तेल, ग्यास अथवा कोइलाको प्रयोगसम्बन्धी कुराहरू उल्लेख नगरिएको भन्दै ध्यानाकर्षण समेत गराएका छन् । अल्जजिराबाट