काठमाडौं । सन् २००७ नेपाली महिला क्रिकेटका लागि ऐतिहासिक दिन थियो । ऐतिहासिक यस अर्थमा कि नेपालले महिला क्रिकेटमा पहिलोपटक अन्तर्राष्ट्रिय प्रतियोगितामा सहभागिता जनाउँदै थियो । मलेसियामा आयोजना हुने एसीसी वुमन्स च्याम्पियनसिपमा नेपालले सहभागिता जनाउन लागेको थियो ।

नेपाली महिला टोलीका मुख्य प्रशिक्षक जंग थापाले नेरी थापाको कप्तानीमा १४ सदस्यीय टोलीको घोषणा गरे । नेपाली टोलीका पूर्वकप्तान एलबी क्षेत्रीले नेपालमा महिला क्रिकेटको जग बसाउँदै महिला क्रिकेट टोलीको स्थापना गरे । तयार भयो, नेपाली महिला क्रिकेट टोलीको पहिलो ब्याच, जसको महत्वपूर्ण सदस्य थिइन् विनु बुढामगर ।

महिला क्रिकेटको बारेमा धेरै चर्चा थिएन । प्रशिक्षकको सिकाइबाहेक खेलाडीले धेरै ज्ञान लिन सकेका थिएनन् । पहिलो प्रतियोगिता खेल्न गएको नेपाली टोली अन्य टोलीभन्दा कमजोर भने देखिएन ।

एसियाली राष्ट्रका टिमहरुले सहभागिता जनाएको उक्त प्रतियोगितामा नेपालले दोस्रो स्थान हासिल गर्‍यो । नेपाल बंगलादेशसँग फाइनलमा पराजित भयो ।

“पहिलोपटक नेपाली महिला क्रिकेट टोलीको खम्बा गाडिएको थियो । हामी पहिलो अन्तर्राष्ट्रिय प्रतियोगिता खेल्न गइरहेका थियौँ, उत्साहसँगै केही नयाँ पनको महसुस भएको थियो । प्रतियोगितामा हामी बलियो नै भयौँ । हामीले सोचेभन्दा राम्रो नतिजा आयो । त्यो बेला नै नेपाली महिला क्रिकेटको भविष्य देखिरहेका थियौँ,” विनुले अन्तर्राष्ट्रिय प्रतियोगिता खेल्दाको पहिलो क्षण सम्झिइन् ।

विनुले राष्ट्रिय टोलीमा रहेर सन् २००७ देखि २०१० सम्म खेलिन् । त्यसपछि उनको यात्रामा धक्का लाग्यो । कहिले उनको व्यक्तिगत कारणले साथ दिएन त कहिले प्रदर्शनका कारणले । तर पनि उनी घरेलु क्रिकेटमा विभागीय टोली एपीएफकी महत्वपूर्ण खेलाडी थिइन् ।

छैटौँ राष्ट्रिय खेलकुद प्रतियोगिताबाट विनुले एपीएफमा आबद्ध भई क्रिकेट खेल्न सुरु गरिन् । उनी एपीएफ महिला क्रिकेट टोलीकी पनि पहिलो ब्याजकी खेलाडी हुन् । एपीएफले पनि छैटौँ राष्ट्रिय खेलकुदबाट नै आफ्नो टिम तयार पारेको थियो । एपीएफले सबै खेलाडीलाई दुई वर्षको ‘कट्याक्ट’मा राखेको थियो ।

“राष्ट्रिय टोलीको मात्र होइन, एपीएफका लागि पनि हामी पहिलो ब्याज थियौँ । मेरो लागि सन् २०१० पछि राष्ट्रिय टोलीको यात्रामा पूर्णविराम लाग्यो । बीचमा केही व्यक्तिगत कारणसँगै प्रदर्शनले पनि साथ दिएन् । घरेलु प्रतियोगितामा भने मैले आफ्नो लयलाई उत्कृष्ट बनाउँदै गइरहेकी थिएँ,” विनुले भनिन् ।

क्रिकेट सुरु गर्नुभन्दा पहिला विनु एथ्लेटिक्स खेल्थिन् । उनी एथ्लेटिक्सकी पनि उत्कृष्ट खेलाडीको रुपमा चिनिन्थिन् । विनुले पाँचौँ राष्ट्रिय खेलकुदमा एथ्लेटिक्स खेलाडीको रुपमा नै सहभागिता जनाइन् ।

एथ्लेटिक्स खेल्नुभन्दा पहिला उनी फुटबल खेलाडी पनि हुन् । फुटबलमा आफ्नो दौड क्षमता धेरै भएका कारण एथ्लेटिक्समा मोडिनु परेको उनी बताउँछिन् । विद्यालयस्तरको राष्ट्रपति रनिङ शिल्डमा त उनी क्रिकेट, फुटबल, भलिबल र एथ्लेटिक्सलगायत खेलमा सहभागी हुन्थिन् ।

“फुटबल खेलाडी भएकै कारण एथ्लेटिक्समा रुचि जाग्यो । एथ्लेटिक्समा मैले राम्रो गरेँ । तर, प्रतियोगिताहरुको रुपमा एथ्लेटिक्समा धेरै प्रतियोगिता हुन्थेनन् । वर्षमा एक प्रतियोगितामा मात्र सहभागिता जनाउन पाइन्थ्यो । अनि, मेरो भविष्य क्रिकेटमा नै छ भन्ने लाग्यो । त्यसैमा मैले आफ्नो भविष्य निर्धारण गर्ने योजना बनाएँ,” विनुले भनिन् ।

विनुले हालै राजधानीमा सम्पन्न ललितपुर मेयर कप क्रिकेटबाट पुनरागमन गरिन् । उनले तीन वर्षपछि पुनरागमन गर्दा पहिलो खेलमा मात्र दुई ओभर बलिङ गर्ने मौका पाइन् । त्यसपछि तीन ओभर बलिङ गरिन् । समग्रमा पाँच खेल खेल्दै १० विकेट लिइन् । उनी प्रतियोगिताकी उत्कृष्ट बलर घोषित भइन् ।

“बिहे, बिहेपछि परिवार । परिवारसँगै छोरीको आगमन । यो सबैसँगै तीन वर्षपछि मैले क्रिकेटमा पुनरागमन गरेकी थिएँ । उक्त पुनरागमन मेरो लागि क्रिकेटप्रतिको मायाको परीक्षाजस्तै थियो । जुन परीक्षामा म सफल पनि भएँ । अब यसलाई निरन्तरता दिनुपर्नेछ,” उनले पुनरागमनको पल सम्झिइन् ।

विनुको अबको लक्ष्य भनेको राष्ट्रिय टोलीमा आफ्नो स्थान बनाउने हो । खेलमा अझै लामो समय बिताउने योजना बनाएकी उनलाई राष्ट्रिय टोलीको जर्सी लगाउने हुटहुटी छ । मौका दिएमा आफूले प्रमाणित गरेर देखाउने उनी बताउँछिन् ।

“मलाई पुनः एकपटक राष्ट्रिय टोलीको जर्सीमा केही गरेर देखाउने जोस छ । जसका लागि मैले धेरै तयारी पनि गरिरहेकी छु । टिमले मलाई स्थान दिएपछि मैले आफूलाई प्रमाणित गरेर देखाउनेछु,” उनले भनिन् ।