नयाँ दिल्ली । भारतको एक अस्पतालमा अक्सिजन अभाव हुँदा २२ बिरामीको मृत्यु भएको छ । महाराष्ट्रको नाशिकस्थित डा. जाकिर हुसैन अस्पतालमा अक्सिजन अभाव भएको थियो ।
अक्सिजन अभाव हुँदा २२ जनाको मृत्यु भएको नासिक नगर निगम आयुक्तलाई उद्धृत गर्दै बीबीसी हिन्दीले जनाएको छ ।
अक्सिजन लिक हुँदा अस्पतालमा करिब आधा घण्टासम्म अक्सिजन आपूर्ति अवरुद्ध भएको थियो ।
अस्पतालमा भर्ना भएका १५० मध्ये गम्भिर अवस्थामा रहेका २३ जनालाई भेन्टिलेटरमा राखिएको थियो । भेन्टिलेटरमा भएका २२ जनाको मृत्यु भएको समाचारमा उल्लेख छ ।
ट्यांकरबाट अक्सिजन भर्ने क्रममा चुहावट भएको जनाइएको छ । अहिले अक्सिजन चुहावट बन्द गरिसकिएको छ । अस्पतालमा अब केवल २५ प्रतिशत अक्सिजन मात्र बाँकी रहेको निगमका आयुक्त कैलाश जाधवले जानकारी दिएका छन् ।
दुर्घटनाको विषयमा छिट्टै अनुसन्धान सुरु गर्ने र दोषीमाथि कडा कारबाही गर्ने जाधवले बताएका छन् ।