लण्डन । मानव अधिकारवादी संस्था एम्नेस्टी इन्टरनेसनलमा नश्लवाद (जातिवाद) र श्वेत विशेषाधिकारको संस्कृति रहेको पाइएको छ । एम्नेस्टीको आन्तरिक समिक्षाअनुसार संगठनका वरिष्ठ कर्मचारीहरूले अश्वेत कर्मचारीमाथि नश्लीय विभेदयुक्त शब्द प्रयोग गर्ने र दूव्र्यवहार गर्ने गरेको पाइएको हो ।
एम्नेस्टी बेलायतका आठ कर्मचारीले आफूले भोगेको नश्लीय विभेदको वर्णन गर्दै एक विज्ञप्ती जारी गरेपछि एम्नेस्टीको सचिवालयले आन्तरिक मूल्याङ्कन गरेको थियो ।
“हामी मानव अधिकार हननविरुद्ध अभियान चलाउने आशमा एम्नेस्टीसँग जोडिएका थियौँ । तर यसको विपरीत संगठनले त्यसलाई कायम राख्न मद्दत गरेको पाएर हामी निराश बनेका छौँ,” एक कर्मचारी केथरिन ओडुकोयाले भनिन् ।
संगठनमा अश्वेत कर्मचारीको क्षमतामा विनाऔचित्य लगातार सोधपुछ गर्ने प्रणालीगत पूर्वाग्रह कायम रहेको, धार्मीकताप्रति संवेदनशीलताको कमी रहेको लगायतका कमजोरीहरू औँल्याइएको छ ।
अन्तर्राष्ट्रिय सचिवालयमा केही व्यक्तिसँग गरिएको व्यवहार पूर्वाग्रहपूर्ण र असंवेदनशील रहेको एम्नेस्टीको अन्तर्राष्ट्रिय बोर्डले स्वीकार गरेको छ ।
यस विषयमा माफी माग्दै संगठनका प्रतिनिधिले आगामी दिनमा यी कुराहरूमा परिवर्तन ल्याउने प्रतिबद्धता व्यक्त गरेका छन् । द गार्डेनबाट