काठमाडौं । नेपालका ओपनिङ ब्याट्सम्यान कुशल भुर्तेलले देशका लागि जित दिलाउँदा आफूलाई खुसी मिल्ने बताएका छन् । घरेलु मैदानमा भइरहेको त्रिकोणात्मक सिरिजमा कुशलले दुई खेलमा उत्कृष्ट प्रदर्शन गर्दे टिमलाई जित दिलाएका थिए । जसमा उनले दुबै खेलमा अर्धशतक प्रहार गरेका थिए ।
नेदरल्यान्ड्सविरुद्धको खेलमा ६२ रनको अर्धशतक प्रहार गरेका कुशलले मलेसियाविरुद्धको खेलमा ६१ रनको अर्धशतकीय पारी खेले ।
त्रिकोणात्मक सिरिजमा डेब्यु गरेका कुशल हाल चर्चाको केन्द्रमा छन् । आफूले यो स्तरको प्रदर्शन गर्दै सबैको माया पाउनुको पछि ठूलो मिहिनेत लागेको बताए ।
उनले डेब्यु खेलमा नै यो किसिमको सफलता मिल्नाले अझै आउने खेलमा उत्कृष्ट प्रदर्शन गर्ने उर्जा मिल्ने बताए ।
“डेब्यु खेलबाट नै सफलता मिलेको छ । यो मेरो लागि सफलताको कुरा हो । यो सफलता र मायाले आगामी खेलमा उत्कृष्ट प्रदर्शन गर्ने हौसला मिल्छ । आउने खेलमा पनि राम्रो प्रदर्शन गर्ने मेरो लक्ष्य छ,” कुशलले भने ।
सोमबार भएको खेलमा नेपालले मलेसियालाई ९ विकेटले हराएको थियो । नेपालले पाएको ११० रनको लक्ष्य १२ ओभर १ बलमा १ विकेट गुमाउँदै पूरा गरेको थियो । जसमा ओपनर कुशल भुर्तेल ४१ बलमा ३ चौका र ५ छक्कासहित ६१ रनमा अविजित रहे ।
टिमले आफूलाई दिएको निर्देशन आनुसार खेल्दा राम्रो नतिजा हात परेको उनी बताउँछन् । उनले नयाँ प्रशिक्षकबाट पनि धेरै कुरा सिक्न पाएकाले सहज भइरहेको बताए ।
“हामीलाई दिएको योजना अनुसार हामीले खेल्यौं र नतिजा निकाल्न सक्यौं । मलाई टिमले साथ दिएको छ विश्वास गरेको छ । यही साथ र विश्वासले राम्रो नतिजा आएका हो । मेरो उत्कृष्ट प्रदर्शनमा प्रशिक्षक ह्वाटमोरको महत्त्वपूर्ण भूमिका छ,” कुशलले भने ।
यसअघि शनिबार नेपालले नेदरल्यान्ड्सलाई ९ विकेटले पराजित गरेको थियो । उक्त खेलमा पनि आसिफ शेख र कुशल भुर्तेलले उत्कृष्ट अर्धशतकीय इनिङ खेलेका थिए । कुशलले ४६ बलमा ५ चौका र ५ छक्कासहित सर्वाधिक ६२ बनाएका थिए । यस्तै, आसिफ शेख ३८ बलमा ४ चौका र ४ छक्का ५४ रनमा अविजित रहेका थिए ।
कुशलले प्रतियोगिताका लागि राम्रो तयारी गरेको बताए । उनले यो प्रतियोगिता मात्र नभएर राष्ट्रिय टोलीका लागि आफूले धेरै मिहिनेत गर्दै आइरहेको बताए ।
“प्रतियोगिताका लागि राम्रो तयारी गरेको थिएँ । यो प्रतियोगितामा उत्कृष्ट प्रदर्शन गर्ने योजना थियो । सफलता पनि मिल्यो,” कुशलले भने ।
घरेलु प्रतियोगितादेखि नै ओपनिङ गर्दै आइरहेका भुर्तेलले अन्तर्राष्ट्रिय प्रतियोगितामा समेत उत्कृष्ट ओपनरको परिचय बनाएका छन् ।