काठमाडौं । नेकपा एमालेका अध्यक्ष तथा प्रधानमन्त्री केपी शर्मा ओलीले मुलुकको राजनीति अकर्मण्यतामा फसेको बताएका छन् । ओलीले सोमबार केन्द्रीय कमिटी बैठकमा प्रस्तुत गरेको राजनीतिक प्रतिवेदनमा प्रतिनिधिसभा पुन:स्थापना भएपनि ढुक्कले काम गर्ने वातावरण नरहेको र वैकल्पिक सरकार बन्न सक्ने अवस्था पनि रहेको उल्लेख छ ।
"ताजा जनादेशका माध्यमबाट मुलुकलाई राजनीतिक स्थिरता, स्वच्छता र विकासको दिशामा लैजाने हाम्रो प्रयास सर्वोच्च अदालतको फैसलाले गर्दा सफल हुन सकेन । सर्वोच्च अदालतको फैसलासँगै २०७५ जेठ ३ गतेबाट सुरू भएको पार्टी एकीकरणको ऐतिहासिक प्रक्रिया पनि कानुनी रूपमा अवरूद्ध भएको छ । संवैधानिक इजलासबाट पुनर्स्थापित भएको प्रतिनिधिसभा न त सरकारलाई दुक्कले काम गर्ने वातावरण दिने, न वैकल्पिक सरकार नै निर्माण गर्न सक्ने अकर्मण्यतामा फस्न पुगेको छ," प्रतिवेदनमा भनिएको छ ।
ओलीले राजनीतिक अन्यौलताका कारण समृद्धिको यात्रा प्रभावित हुने आशंका पनि व्यक्त गरेका छन् । प्रतिवेदनमा राष्ट्रिय राजनीतिलाई अस्थिरता, अन्यौल र गतिरोधमा जानबाट रोक्नु पर्ने दायित्व आफ्नो काँधमा आएको उल्लेख छ ।