कायरो । इजिप्टको कल्यूबिया प्रान्तमा रेल दुर्घटना हुँदा कम्तिमा ११ जनाको मृत्यु भएको छ । राजधानी कायरोबाट नाइल डेल्टा शहर जाने क्रममा भएको उक्त दुर्घटनामा अन्य ९८ जना घाइते भएका छन् ।
स्थानीय समयअनुसार करिब २ बजे कायरोबाट ४० किलोमिटर उत्तरमा पर्ने कल्यूबिया प्रान्तमा दुर्घटना भएको हो । रेलको ४ वटा डिब्बा लिकबाट बाहिरिएको इजिप्टियन नेशनल रेलवेजलाई उदृत गर्दै अलजजिराले जनाएको छ ।
घाइतेको उद्दारका लागि ५० भन्दा बढी एम्बुलेन्स खटाइएको थियो । उनीहरुको अहिले स्थानीय अस्पतालमा उपचार भइरहेको समाचारमा उल्लेख छ । दुर्घटनाको कारणबारे अनुसन्धान सुरु गरिएको जनाइएको छ ।
इजिप्टमा यो वर्ष मात्र रेल दुर्घटनाबाट धेरैले ज्यान गुमाइसकेका छन् । यसअघि गत मार्चमा दुई वटा रेल एकआपसमा ठोक्किँदा कम्तिमा २० जनाको मृत्यु भएको थियो भने झण्डै २०० जना घाइते भएका थिए ।