काठमाडौं । त्रिकोणात्मक टी–ट्वान्टी आई सिरिज अन्तर्गत आज (सोमबार)को खेलमा नेपाल र मलेसियाबीच प्रतिष्पर्धा हुँदैछ ।

कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने खेल  दिउँसो सवा एक बजेदेखि सुरु हुनेछ । आजको खेलमा जित निकाल्दै नेपाल आफूलाई बलियो बनाउने योजनामा छ । 

नेपालले शनिबार भएको पहिलो खेलमा नेदरल्यान्ड्सलाई ९ विकेटले पराजित गरेको थियो ।  पहिलो खेलमा नेपालका लागि डेब्यु गरेका कुशल भुर्तेल र आशिफ शेखले अर्धशतकीय पारी खेलेका थिए । 

पहिलो खेलमा सहज जित निकालेको नेपाललाई आजको खेलमा पनि जित निकाल्ने मौका छ ।  डेब्यु खेलमा प्रभाव छाडेका खेलाडीलाई आजको खेलमा उत्कृष्ट प्रदर्शन गर्न हौसला मिल्नेछ । 

यता मलेसिया आफ्नो पहिलो खेलमा नेदरल्यान्ड्सँग १५ रनले पराजित भएको थियो । नेपाल र मलेसियाबीचको हालसम्मको नतिजा हेर्दा नेपाल बलियो मानिएको छ । 

नेपाल र मलेसियाबीच हालसम्म चार टी–ट्वान्टी आई खेलहरु भएका छन् । जसमा नेपालले तीन टी–ट्वान्टी आईमा जित निकालेको छ । त्यसैले आजको खेलमा नेपाली खेलाडीको मनोबल उच्च हुनेछ । 

नेपालका लागि आजको खेलमा पनि कुशल भुर्तेल र आशिफ शेखले ओपनिङ सम्हाल्नेछन् ।  मध्य क्रममा ज्ञानेन्द्र मल्ल, दिपेन्द्र सिंह ऐरी र विनोद भण्डारीले साथ दिनेछन् । 

त्यस्तै बलिङतर्फ नेपालका सोमपाल कामी, अविनास बोहोरा, करण केसी र सन्दीप लामिछानेले सम्हाल्ने छन् ।  मलेसियाले नेपाललाई अन्तिम पटक २२ रनले पाराजित गरेको थियो । 

नेपालले दुई स्पिनर र तीन तीव्र गतिका बलर खेलाउने रणनीति देखिन्छ । स्पिनरमा लेग स्पिनर सन्दीप लामिछानेलाई साहब आलमले साथ दिन सक्छन् । साहबले नेदरल्यान्ड्सविरुद्धको खेलबाट टी–ट्वान्टी आईमा डेब्यु गरेका थिए । 

नेपालका लागि मलेसियाका युवा खेलाडी विनरादीप र पवनदीप सिंहका दाजुभाई नेपाललाई ‘घातक’ बन्न सक्छन् ।

नेदरल्यान्ड्सँगको खेलमा विरनदीपले ८७ रनको इनिङ खेलेका थिए । कप्तान अहमद फैज अनुभवी खेलाडी हुन् । सैद अजिज पनि राम्रो ब्याटिङ गर्ने खेलाडीका रुपमा चिनिन्छन् ।