काठमाडौं । त्रिकोणात्मक टी–ट्वान्टी क्रिकेट सिरिजको पहिलो खेलमा नेपालले सानदार जित हासिल गरेको छ । नेपालले नेदरल्यान्ड्सलाई ९ विकेटले हराएको हो ।
शनिबार कीर्तिपुरस्थित त्रिवि अन्तर्राष्ट्रिय क्रिकेट मैदानमा नेदरल्यान्ड्सले दिएको १३७ रनको लक्ष्य नेपालले १५ ओभरमा एक विकेट गुमाएर पूरा गर्यो ।
टी–ट्वान्टी अन्तर्राष्ट्रियमा डेब्यु खेलमै ओपनिङ गरेका कुशल भुर्तेल र आशिफ शेखले ११६ रनको साझेदारी गरे । कुशल र आशिफ डेब्यु खेलमै अर्धशतक प्रहार गर्न सफल भए । कुशलले ४६ बलमा पाँच चौका र पाँच छक्कासहित ६२ रन जोडे ।
आशिफले ३८ बलमा चार चौका र चार छक्काको मद्दतमा अविजित ५४ रनको अर्धशतकीय पारी खेले । यस्तै, कप्तान ज्ञानेन्द्र मल्लले १३ रन बनाए ।
यसअघि, टस हारेर पहिले ब्याटिङ गरेको नेदरल्यान्ड्सले निर्धारित २० ओभरमा ४ विकेट गुमाउँदै १३६ रन बनाएको थियो ।
नेदरल्यान्ड्सका लागि बास डी लीडले सर्वाधिक ४१ रन बनाएका थिए । स्कर्ट एडवार्डसले ३० रन जोडे ।
बलिङतर्फ नेपालका लागि सन्दीप लामिछानेले दुई विकेट लिए । शाहाब आलम र सोमपाल कामीले समान एक/एक विकेट लिए ।
नेपालले सिरिजको दोस्रो खेलमा मलेसियासँग वैशाख ६ गते खेल्नेछ । तेस्रो खेलमा नेपालले नेदरल्यान्ड्ससँग वैशाख ७ मा खेल्नेछ । नेपालले अन्तिम लिग खेलमा वैशाख ९ गते मलेसियासँग खेल्नेछ ।
डबल राउन्ड रोबिनको आधारमा हुने सिरिजको शीर्ष दुई टिमले उपाधिका लागि प्रतिस्पर्धा गर्नेछन् ।