काठमाडौं । त्रिकोणात्मक टी–ट्वान्टी क्रिकेट सिरिजअन्तर्गत पहिलो खेलमा नेदरल्यान्ड्सले नेपाललाई *१३७ रनको लक्ष्य दिएको छ ।

शनिबार कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको नेदरल्यान्ड्सले निर्धारित २० ओभरमा ४ विकेट गुमाउँदै १३६ रन बनायो ।

नेदरल्यान्ड्सका लागि बास डी लीडले सर्वाधिक ४१ रन बनाए । उनले ४९ बलमा तीन चौका र दुई छक्कासहित ४१ रन जोडेका थिए । स्कर्ट एडवार्डसले ३२ बलमा दुई चौका र एक छक्कासहित ३० रनको योगदान गरे ।

बलिङतर्फ नेपालका लागि सन्दीप लामिछानेले दुई विकेट लिए । शाहाब आलम र सोमपाल कामीले एक/एक विकेट लिए ।

नेपालका लागि आजको खेलमा शाहाब आलम, कुशल भुर्तेल र आसिफ शेखले डेब्यु गरेका छन् । तीन युवा खेलाडीलाई मौका दिइएको हो ।

*सच्याइएको । १३७ हुनुपर्ने ठाउँमा यसअघि अन्यथा पर्न गएकोले सच्याइएको छ ।